Diyarname
Navên kesên di 18'emîn Pêşbaziya Xelatên Rojnamegerî ya Mûsa Anter û Şehîdên Çapemeniyê hatin eşkerekirin. Di beşa nûçeya kurdî de nûçegihanê DÎHA'yê Abdurahman Gok û Samî Yilmaz xelat girt.

Îsal rojnameya Ozgur Gundem û Azadiya Welat bi hev re 18'emîn Pêşbaziya Xelatên Rojnamegerî ya Mûsa Anter û Şehîdên Çapemeniyê organîze kir. Di beşên nûçeya kurdî, nûçeya tirkî, wêne û karîkaturê de berhemên hêjayî xelatê hatin dîtin dê roja 20'ê mehê, di roja salvegera qetilkiran Musa Anter (Apê mûsa) de li Amedê bi merasimekê bêne xelatkirin. Apê Mûsa hem di vê mesasimê de hem jî dê li Nisêbînê bi merasimekê ew bê bibîrananî.

Navên kesên ku bi ser ketin hatin eşkerekirin. Vane kes û berhemên bi ser ketine:

Nûçeya kurdî

Di beşa nûçeya kurdî de nûçeya bi navê; "Ji bo bilindahiya rojê ku ji rojhilat hiltê mînakek: Komunên Gundan" nûçegihanê DÎHA'yê Abdurrahman Gok û Samî Yilmaz hêjayî xelatê hatin dîtin. Xelata Juriyê ya Taybet ya Nûçeya Kurdî jî bi nûçeya, 'Pilingê Kurdistanê" hêjayî nûçegihanê ANF'ê Abdullah Bîlen hate dîtin.

Nûçeya Tirkî

Di beşa nûçeya tirkî de jî ji Ajansa Nûçeyan a Dîcleyê nûçegihan Mutha Çetîn û Evrîm Kepenek hêjayî xelatê hatin dîtin. Çetîn û Kepenek bi nûçeya bi navê, "Tecawuza Leşkeran a 66 rojan dewam kir" beşdarî pêşbaziyê bûbûn.
Xelata Juriyê ya Taybet ya Tirkî jî ji bo nûçegihanê Gazete HaberTurkê Îlyas Akengîn ji bo nûçeya bi navê, "Me tecawuz kir, tu xwe daliqîne"

Wêne û Karîkatur

Di beşa wêneyê de xelat ji bo Selahattin Sonmez ji ber wêneyê bi navê, "Sen Yanmazsan Ben Yanmazsam" (Tu ne şewitî, ez neşewitim) hêjayî xelatê hat dîtin. Sonmez di rojnameya Hurriyet Daily News de dixebite.

Juriyê Wêneyê Ramazan Yavuz ê bi navê, "Du rûyên Başûr-rojhilat ê nayên guhertin: Dijwarî û xizanî" jî hêjayî Xelata Taybet a Juriyê dît. Ramazan Yavuz di Ajansa Nûçeyan a Doganê (DHA) de dixebite.

Juriyê beşa karîkaturê xelata yekemîn da Mûsa Keklîk. Musa Keklîk ku di sala 1981'ê de li Sêrtê ji dayik bû ye ji sala 2000'î ve di kovarên mîzahê de dixebite. Heta niha ew beşdarî gelek pêşengehan bûye.

Her wiha xelata taybet a juriyê ya karîkaturê jî dan Murat Îpek. Murat Îpek hê jî di Girtîgehê de ye.

Xelat dan Banu Guven

Xelata Gurbetellî Ersoz ji ber hestyariya xwe ya di warê pirsgirêka kurd de pêşkêşvan Banu Guven ku ji ber pirsgirêka kurd dianî rojevê neçar ma ji televîzyona dixebitî derkeve hêjayî xelatê hate dîtin.

Mazlûm Erencî nehat jibîrkirin

Xelata Çapemeniya Azad a Rûmetê jî ji bo malbata Mazlûm Erencî ku di encama şerê li Dêrsimê de ku hê 17 salî bû jiyana xwe ji dest da hate dayîn. Mazlum Erencî hê di zaroktiya xwe de di nav çapemeniya kurd de cih girtibû.

Her wiha Xelata Kedê ya Çapemeniya Azad dan MEYADER. MEYADAR di nava salê de li gelek bajaran ji bo kişfkirina gelek gorên giştî xabat meşand û ev keda wê, hêjayî xelatê hat dîtin.

Heta niha van rojnameyan xelat dan:

Yekemîn Pêşbaziya Xelatên Rojnamegerî ya Musa Anter û Şehîdên Çapemeniyê di sala 1993’yan de ji aliyê “Ozgur Gundem”, 94’an de “Ozgur Ulke”, 95’an de “Yenî Polîtîka”, 96’an de “Demokrasî”, 97 û 98’an de “Ulkede Gundem”, 99’an de “Ozgur Bakiş”, 2000’î de “2000’de Yenî Gundem”, 2001 û 2002’yan de “Yedîncî Gundem”, 2003’yan de “Yenîden Ozgur Gundem”, 2004, 2005 û 2006'an de ji aliyê “Ulkede Ozgur Gundem”, 2007'an de ji aliyê Gundemê, 2008'an de ji aliyê rojnameya Azadiya Welat û rojnameya Alternatîfê, 2009 û 2010'an de ji aliyê Azadiya Welat û Gunluk ve û di sala 2011'an de jî ji aliyê rojnameya Ozgur Gundem û Azadiya Welat ev xelat hate dayîn.

***

Nûçeya eleqedar:

- Pêşbaziya Apê Mûsa li benda berheman e