Diyarname
Heta niha ku li dor 3 hezar siyasetmedarên kurd hatibûn girtin, dadgehê careke din berê xwe daye BDP'ê. Cîgira Hevserokên BDP'ê Parêzer Meral Daniş Beşdaş li ser girtinên dawî îro daxuyaniyeke da çapemeniyê.
Beştaş ku di heman demê de Berpirsa Beşa Mafên Mirovan û Hiqûqê ya BDP'ê ye li ser operasyonên dijî BDP'ê yên piştî hilbijartina 12'yê pûşpera 2011'an axivî. Beştaş wisa got: "Endamek û rêveberek partiya me ku der barê wî/ê de doz nehatibe vekirin nemaye. Di 6 mehên dawî de hezar û 356 endam û rêveberên me hatin tewqîfkirin."

Beştaş gotina Serokwezîrê Tirkiyeyê Erdogan a wekî "Yan werin ser xeta meşrûtiyetê yan na çi lazim e dê bê kirin" bibîr xist û diyar kir ku di vê hefteya borî de li hemberî rêxistina me operasyoneke cidî heye.

Cîgira Hevserokên BDP'ê Beştaş li ser darazê jî wisa got: "Di van operasyonan de jî diyar bûye ku daraz ne serbixwe ye. Ji ber ku bi taybetî bi fermana Serokwezîr dadgehê operasyon dane dest pê kirin."

Li ser tewqîfkirinan jî Beştaş ev agahî dan:

- Niha binçavkirin û girtin ji salên 90'î xirabtir bûne.
- Ji avrêla 2009'an ve heta niha zêdeyî 3 hezar siyasetmedar hatine girtin.
- Ji girtîgehên herêmê girtî ji bo girtîgehên din sewq tê kirin.
- Niha tu şaredar, serokê/a rêxistinên me yên bajaran, endamên Meclisa Giştî yên Bajêran, rêveberên me ku der barê wan de doz nehatibe vekirin nîn in.
- Der barê rêveberên me de dozê daxwaza cezakirina bi dehan salan ên girtîgehê têne vekirin.
- 9 şaredarên me û 6 mebûsên me di girtîgehê de ne.
- 40-45 endamên meclisên şaredariyên me girtî ne.
- Di 6 mehên dawî de hezar û 356 endam û rêveberên me hatine tewqîfkirin.

Di dawiyê de Beştaş xwest zagonên TCK û TMK bêne guherandin û got: "Ger yên ji bo em bikevin nav siyasetê ne dirû bin, ger ji dil in bila van zagonan biguherînin."