Ergîn Çaglar / AMED / MA

Hevseroka MED-DER'ê Şîlan Elmas Kan, diyar kir ku wê careke din bi partî û komeleyên ku ji bo zimanî kurdî bibe zimanê perwerdehiyê kampanya îmzeyan dabûn destpêkirin re bên gel hev. 

Komîsyona 21'ê Sibatê/Reşemiyê ku Tora Ziman û Çanda Kurdî, Platforma Zimanê Kurdî û gelek partiyên siyasî jî di nav de cih digirin, di 22'ê sibatê/reşemiyê de bi daxwaza ku zimanê kurdî bibe zimanê fermî û perwerdeyê kampanyaya îmzeyan dabû destpêkirin. Rêveberên kampanyayê armanc dikin ku mîlyonek îmze kom bikin. Yek ji rêvebera kampanyayê Hevseroka Komeleya Lêkolînên Çand û Zimanên Mezopotamyayê (MED-DER) Şîlan Elmas Kan, diyar kir ku heta niha 200 hezar îmze kom kirine û banga mezinkirina kampanyayê kir.

ARMANCA HEVPAR

Kan, destnîşan kir ku kampanyaya bi coşeke mezin dane destpêkirin didome û got ku kampanya ji bo kurdî gelek girîng e. Kan, bal kişand ser zext û êrîşên ku di demên dawî de li dijî kurdî pêk tên û got: "Êrîşên nîjadperest ku li Konya û Enqereyê pêk hatin xebatên me yên ziman sist kirin. Lê divê em li dijî êrîşan hê bêtir li xebatên xwe xwedî derkevin. Divê em xebatên xwe yên ziman berfireh bikin û ji xwe re bikin armanc. Niha wekî ku em dixwazin xebat dikin? Na. Me dixwest ji bo xebatên xwe yên ziman şahî li dar bixin, kampanya bidine destpêkirin û standan vekin. Lê ev nayê wê wateyê ku em terka xebatên xwe bikin. Em ê xebatên xwe mezin bikin û bidomînin. Em ê hewl bidin xebatên xwe yên ziman bikin rojeva gelê kurd. Herkesê ku ji xwe re dibêje, 'Ez kurdistanî me' divê li xebatan xwedî derkeve. Heta ku em li zimanê xwe xwedî derkevin em li pey hev pirsgirêkên xwe çareser bikin."

ÎNKARA SEDSALΠ

Di berdewamê de Kan da zanîn ku gotinan "yek ziman, yek al, yek netew" cudahiyên welat tune dihesibîne û bi lêv kir ku ji çapemeniyê heta saziyên dewletê zextên li ser kurdî bi van gotinan tên pêşxistin û wiha pêde çû: "Êrîşên îro ji ber xwedîderketina li kurdî pêk tên. Bi salan e dibistanê dewletê û çapameniyê wê ji bo ku gelê kurd ji ziman û çanda xwe dûr bikeve bi feraseta netewperest xebatan dimeşînin. Êrîş nîşana ketine meriyetê ya nêrîna faşîst ku bi salan e tê hilberandinê ne. Ev derketina holê ya siyaseta înkarê ya sedsalî ye."

200 HEZAR ÎMZE KOM BÛNE

Têkildarî xebatên li peşiya wan jî Kan, daxuyand ku wê bi komele, rêxistin û partiyên ku xebata ziman dikin re careke din bên gelhev û têkildarî mijarê ev agahî dan: "Em ê di rojên pêş de tekildarî xebatên îmzeyan bi partiyên siyasî yên di komîsyonê de cih digirin re bên gel hev. Niha li gorî agahiyên li ber destê me nêzî 200 hezarî îmze hatine berhevkirin. Em ê di 21'ê Sibata/Reşemiya bê de hedefa xwe mîlyonek îmze pêk bînin û parastina zimanê kurdî bikin. Em ê nêzikbûna dewletê ya ji bo kurdî careke din derbixin holê. Heke ziman bê jibîrkirin çand û nasname jî tê jibîrkirin. Ji bo vê divê herkes ji bo zimanê xwe xebat bike û rêxistibûna vê bike."