Amadekar: Cemil OGUZ

Helbet weşana çapkirî li dinyayê di nav rewşek giran de ye ji ber ku her ku diçe qada dîjîtal xurtir û berfirehtir dibe. Ligel vê yekê jî li dinyayê weşanên çapkirî, yên li ser kaxiz weşana xwe  didomînin. Di nav kurdan de jî. Beşek ji vê weşanê jî kovar in. Me berê xwe da kovarên kurdî yên ku çap dibin. 

Li Bakur û li Tirkiyeyê di sala 2021'ê de kîjan kovarên bi kurdî nû derketin, kîjan ji nû ve dest bi weşanê kirin û kîjanê weşana xwe ya heyî domand? Me lîsteya wan derxist. 16 kovar ketin nava lîsteya me. Me xwest em wan careke din bibîr bixin û belkî ev nûçeya me bibe sedem ku ew hinek din bêne firotin û xwendin.

Va ye lîsteya kovarên

- NÛBIHAR

Li di nav hemû kovarên kurdî de kovara Nûbiharê ye herî kevn e. Kovarê sala 1992'yan de dest bi weşanê kir û ji wê demê ve didome. Kovara ku di bin banê Weşanxaneya Nûbiharê de ye sê mehan carek derdikeve. Û kovarê vê payîzê hejmara xwe ya 157'an derxist.

- NÛBIHAR AKADEMÎ

Kovara "Nûbihar Akademî" kovareke akademîk a li ser xebatên kurdî ye. Kovar nivîsên akademîk belav dike . Kovar salê du hejmaran çap dike û payîza 2021'ê de hejmara wê ya 16'an derket.

- VATE

Vate kovareke bi kirmanckî ye û sê mehan carek derdikeve. Niha Vate tekane kovara bi kirmanckî ye ku weşana xwe didomîne. Vateyê herî dawî hejmara xwe ya 69'an weki hejmara havîna 2021'ê derxist.

- DILOP

Dilop kovareke bi kurdî û tirkî ye û li ser çand, huner û polîtîkayê weşana xwe didomîne. Kovar di sala xwe ya 4'an de hejmara xwe ya 20'î di meha kewçêr-sermaweza 2021'ê de derxist. Kovarê hê hejmara 21'ê dernexistiye.

- ZAREMA

Zarema kovara rexne-teorî ye. Heta hejmara 13'an hatibû û navber dabû weşana xwe. Kovar îsal kete bin banê Weşanxaneya Avesta de û ji nû ve dest bi weşanê kir. Kovarê hejmara xwe ya 14'an (Gulan, Pûşper, Tîrmeh, Gelawêj 2021) derxist û paşê di mehên din ên salê de hejmara 15'an jî. Li gor bernameya wan divê vê mehê hejmara 16'an derê.

- PSYCHOLOGY KURDÎ

Kovara Psychology Kurdî li ser derûninasiyê weşana xwe dike. Kovara ku ketiye sala xwe ya 5'an ew jî îsal ket bin banê Weşanxaneya Avestayê. Kovarê îsal hejmarên xwe yên 12 û 13'yan (gulan, pûşper, tîrmeh, gelawêj) pêşkêş kirin lê hejmara 14'an ku divê payîzê derketa hê derneketiye.

- ZEND

Zend kovareke li ser ziman e û ji aliyê Enstîtuya Kurdî ya Stenbolê ve tê amadekirin û derxistin. Zendê îsal tenê hejmareke derxist ku ew jî hejmara wê ya 28'an e û di meha avrêlê de derket.

- KURDEÇÎROK

Kovara bi navê "Kurdeçîrok" li ser çîrok û wergera çîrokan weşana xwe didomîne. Kovara ku her sê mehan carek derdikeve, par dest bi weşanê kir û payîza 2021'ê de hejmara xwe ya 3'yan derxist.

- FOLKLOR Û ZIMAN

Kovara "Folklor û Ziman" ji aliyê Weqfa Mezopotamyayê ve tê derxistin. Kovar "Kovara Akademîk û NAvneteweyî ya Xebatên Kurdî" ye û salê du caran derdikeve. Kovarê hejmara xwe ya 2'yan payîzê derxist.

- FOLKLORAME

Kovara "Folklorame" bi diruşma "Zagotin pişt e, folklor her tişt e!" weşana xwe li ser folklorê didomîne. Kovara ku di bin banê Weqfa Mezopotamyayê de derdikeve heta niha 9 hejmarên wê derketine û van rojan divê hejmara 10'an bigihîje ber destên xwendevanan.

- DESTAR

Kovara "Destar" kovareke wêjeyî ye. Kovara ku îsal dest bi weşana xwe kir sê mehan carek derdikeve. Kovarê hejmara xwe ya diduyan payîza 2021'ê de derxist.

- ZIRÎNG

Kovara Zirîngê kovareke mîzahî bû û mehê carek derdiket. Kovarê herî dawî di meha adara 2021'ê de hejmara xwe ya 12'yan derxist û paşê navber da weşana xwe. Serdema pendemiyê, zehmetiya belavkirinê barê kovarê giran kiribû. Hat gotin ku piştî demek dê dîsa dest bi weşanê lê carek din kovar derneket.

- WÊJE Û REXNE

Kovara bi navê "Wêje û Rexne" piştî rawestina demekê di sala 2021'ê de carek din derket. Kovarê havînê hejmara xwe ya 12'yan pêşkêş kir, paşê hejmareke din dernexist. Kovar li ser wêje, rexne û teoriya rexneyê weşana xwe dike. 

- 'KURT TARÎHÎ'

Kovara "Kurt Tarîhî" niha di bin banê Weqfa Îsmaîl Beşîkçî de derdikeve. Kovara ku dema derket bi tirkî bû û di salên dawî hin nivîsên bi kurdî jî diweşîne, weşana xwe didomîne. Kovar her sê mehan carek bi mijara li ser dîroka kurdan tê amadekirin û belavkirin.

- AŞDAD

"Aşdad" kovareke li ser hiqûqê ye û ji aliyê Baroya Amedê ve hatiye amadekirin û derxistin. Hejmara yekem a kovarê bihara 2021'ê de derket. Kovarê wekî kovara sêmehane dest bi weşanê kir, lê îsal tenê ew hejmar derxistiye û li gor agahiyên li ber dest ew niha amadekariya hejmara duyemîn dikin.

- DADISTAN

Kovara "Dadistan" bi piştgiriya Baroya Şirnexê û xebata hiqûqnasan hatiye amadekirin. Kovareke li ser hiqûqê ye. 6'ê meha berfanbara 2021'ê de ji ser hesabê xwe yê twittirê re ragihandin ku kovar çû çapê, lê heta niha derneketiye. 

Têbinî: Kovarên bi kurdî yên ku me ji bîr kiribin hebin, haya me pê bixin emê lê zêde bikin.

***

Nûçeyên Eleqedar:

- 2021: Vane hemû pirtûkên salê 

- 2021: Kurdên ku xatir xwestin 

- 2021: Kitabê ke Obama weçînayê 

- 2021: Delala kaînatê hat hilbijartin 

- 2021: 25 jinên herî bi bandor ên salê 

- 2021: Di nav 'Fotografên Herî Serketî yên Dîrokê' de fotoyê Nemrûdê jî heye 

- 2021: Fotografên salê, yek jê ji Duhokê ye 

- 2021: The Timesê 10 pirtûkên salê hilbijartin 

- 2021: Neteweyên Yekbûyî hejmara jinên ku hatine kuştin eşkere kir 

- 2021: Fotoyên çivîkan yên serketî hatin hilbijartin 

- 2021: Oksfordê peyva salê hilbijart      

*** 

MAIL: diyarname@diyarname.com