Diyarname

Li navçeya Amasra ya bajarê Bartina Tirkiyeyê di Midûriyeta Saziya Komirê ya Tirkiyeyê de vê êvarê teqîn çêbû, heta vê êvarê hejmara kesên canê xwe ji dest dane derket 22’yan. Li gor Wezareta Tenduristiyê heta niha ji 17 karkerên birîndar 8 jê bi giranî birîndar in û di beşa nexweşên giran de ne.

Ji bajar û navçeyên derdorê erebeyên 5 UMKE û 31 ambûlans, erebeya destwerdana lezgîn şandin cihê bûyerê.

Wezîrê Enerjî û Çavkaniyên Xwezayî yê Tirkiyeyê Fatih Donmez got ku li ser teqînê agahiyên pêşî yên li ber destên wan ev in, “Di nirxandina pêş de hevalên me diyar kiriye ku teqîna grîzû ye.”

3 dozgerên ku hatine peywirdarkirin ji bo lêkolînê çûn cihê bûyerê. Walîtiya Bartinê eşkere kir ku bûyer saet 18.15 de di -300 kota jêrxaneyê de çêbûye. Di vê beşê de 110 karker hebûn, ji van 49 jê di beşa bi talûke de bûn.

Li aliyê din di rapora raçavkirinê ya Sayiştayê de hatibû eşkere kirin ku li vê derê talûkeya teqîna grîzû heye. Mebûsê CHP’ê yê Zonguldakê bi ser tora civakî re ev agahî belav kir.