ENQERE
Şaredarê Bajarê Mezin ê Amedê Osman Baydemîr, bi Serokomarê Tirkiyeyê Abdullah Gul re hevdîtinek pêk anî. Baydemîr, di hevdîtinê de bal kişand ser komkujiya Qilebanê û xwest pêkanînên serdemên berê neyên dubarekirin. Baydemir, anî ziman ku tenê rêya çareseriyê muzakere û diyalog e.

Serokomar Gul li Koşka Çankaya mazûvanî ji bo Şaredarê Bajarê Mezin ê Amedê Osma Baydemîr û heyeta pêre kir. Hevdîtin bi qasî nîv saetekê dom kir. Piştî ziyaretê Şaredarê Bajarê Mezin ê Amedê Osman Baydemir, diyar kir ku ji bo Sûrên Amedê bên parastin û restorekirin bi Gul re hevdîtin pêk anî û wiha got: "Me der barê parastina Sûrên Amedê de raporek pêşkêş kir. Ji bo Sûrên Amedê bên parastin û li gorî rol û mîsyona xwe xizmetê bikin me rapor pêşkêş kir. Me dîsa li ser geşedanên rojane sohbet kir. Di sedsala 21'ê de divê canek jî neyê kuştin. Em naxwazin canek jî têkeve axê. Çareseriya vê pirsgirêkê muzakere û diyalog e. Parvekirin û aştî ye. Divê em ji geşedan û serpêhatiyên berê dersê derxin û rêbazên berê bikar nînin. Divê em rêbazên berê betal bikin."

Baydemîr, di hevdîtinê de 21 daxwaz pêşkêşî Serokomar Abdullah Gul kir. Baydemîr daxwazên ku pêşkêşî Serokomar kir wiha rêz kir:

* Ji bo Sûrên Amedê û avahiyên nava sûrê li gorî cewher û mîmariya xwe bên parastin me xwest bi tevahî li gorî cewherê wê bê restorekirin. Me xwest çalakiya lezgîn a 3 salan bê amadekirin.

* Divê Wezîrê Çandê sala 2013'yan sala "Sala Sûrên Amedê" îlan bike û di qada navneteweyî de îlan bike.

* Divê 21 bircên wêran bûne zû bên restorekirin. Divê 50 bircên din jî bên paqijkirin.

* Divê hemû projeyên têkildarî sûrê tên amadekirin rêveberiya herêmî jî di nav de cih bigire.

* Divê avahiyên dîrokî ji aliyê Veqfa Mulkiyeyiyê ve bê parastin û paqijkirin.

* Divê Midûriyeta Herêma Veqfan sulîeta Sûka bin erdê ya Celal Guzelses ku li pêş Mizgefta Mezin hatiye avakirin bê hilweşandin.

* Divê ji bo Çiftehanê proje bê amadekirin û bê restorekirin.

* Divê ji bo avahiyên mîmarî bên parastin û restorekirin. Bi rêveberiya herêmî re xebat bê meşandin.

* Divê 1531 avahiyên bilind bi hevkariya Şaredariya Bajarê Mezin û TOKÎ'yê li gorî mimariya sûrê bê restorekirin û parastin. Qad divê wekî sîtê bê îlankirin.

* Divê li taxa Şehitlikê û Benusenê 1160 şevnişîn bi alîkariya TOKÎ ji nû ve peyzaja wan bê çêkirin û rastkirin.

* Divê warên çandî ji aliyê Wezîrê Çandê ve bên parastin.

* Divê di çarçoveya Geliyê Çemê Dîcleyê de ji aliyê DSÎ'yê ve li ser Çemê Dîcleyê 2 regulator bên avakirin.

* Divê li ser Geliyê Çemê Dîcleyê Tesîsên Sporê yên Avê, Parkên Botanîk û Golên avê bên çêkirin.

* Divê Wezareta Çand û Baweriyê di sala 2010-2023'yan de Amedê têxe nava projeya Plana Stratejik a Çand û Bajarên Marka û nexyenên çand û baweriyê bên parastin.

* Divê warên dîrokî ji aliyê Serokomar ve bên parastin.

* Divê Balafirgeha leşkerî ji trafîka navneteweyî re bê vekirin û balafirgeh bibe qada sivîl.

* Divê rêya derdorê ya Xerpêt Farqîn, Mêrdîn Farqîn ji aliyê Midûriyeta Rêyên Bejayî ve bê sazkirin.

* Divê Midûriyeta Rêyên Hesin projeya Trêna bi lez têxe meriyetê.

* Divê otel bên çêkirin.

DÎHA