DiyarName.Com

6'ê mehê, agahiyên li ser Rojava...

...ev tê nûkirin...

‘Kurdan bi berxwedana xwe rihê Qazî Mihemed şad kir’
DEM Partî ya navçeya Payîzava ya Wanê, ji bo piştgiriya Rojava li navenda navçeyê meşek li dar xist. Di meşê de pankarta “Xwedîderketina Rojava xwedîderketina mirovahiyê ye, Rojava xeta me ya sor e” vekir.
Endamê MYKê yê Partiya Komunîst a Kurdistan (KKP) û parlamenterê DEM Partiyê Sînan Çîftyurek, hevşaderên Bajarê Mezin ên Wanê Neslîhan Şedal û Abdullah Zeydan, hevserokên DBP û DEM Partiyê yên Wanê, nûnerên saziyên sivîl û gelek welatî tevli meşê bûn.
Parlamenterê DEM Partî Sînan Çîftyurek li vir axivî û got, "Kurdan bi berxwedana xwe rihê Qazî Mihemed şad kiriye. Yên ku dixwestin statuya Rojava ji holê rakin, têk çûn.”
*

HSD'ê pêşwazî heyeta Wezareta Parastinê kir
Hêzên Sûriyeya Demokratîk (HSD) li Hesekê heyeta Wezareta Parastinê ya Sûriyeyê pêşwazî kir.
Li ser navê HSD'ê Fermandan Çiya Kobanî û li ser navê heyeta Wezareta Parastinê ya Sûriyeyê Hamza el-Hamidi ligel endamên heyetan hatin ba hev.
HSD'ê got ku der barê meseleya entegrasyonê de heyet hatine ba hev û gotin gotûbêj dewam dikin.
**

Însiyatîfa Yekîtiya Demokratîk: Gavek zûtir Deriyê Murşîdpinarê vekin
Însiyatîfa Yekîtiya Demokratîk li ser dorpêça Kobanî daxuyanî da û banga vekirina Deriyê Murşîdpinarê kir.
Însiyatîfê got ku vekirina Deriyê Murşîdpinarê ne tenê ji bo alîkariya mirovî dê watedar be, di heman demê de ji bo dawîkirina helwesta neyînî ya li dijî Kobanî jî wê bibe gaveke girîng.
Însiyatîfê bal kişand ser helwesta AKP'ê jî û got, "Di çarçoveya alikariya mirovî de Platforma Piştgirî û Parastina Amedê çend roj berê ji bo Kobanî alîkarî kom kir. Karwana alîkariyê ku bi barên xwe yên ji av, şîr, betanî, xwarin, kelûpelên paqijiyê yên jinan û mama pêk dihat, ber bi deriyê sînor ê Murşîtpinarê ve bi rê ket lê Hikumeta AKP'ê rê neda ku alîkarî derbasî Kobanî bibe. Heta ku hewldanên alîkariyê ji aliyê parlamanterekî AKP'ê ve wekî “şova sîyasî” hatin pênasekirin.”

**

Heyeta Kobanî çû Helebê: Divê hêzên Şamê ji gundên Kobanî derkevin
Endamên Heyeta Rêveberiya Xweser a Kobanî Mizgîn Xelîl û Ebdulrehman Demir li ser encamên hevdîtina li Helebê, daxuyanî dan. Mizgîn Xelîl got ku divê hêzên leşkerî yên girêdayî Şamê ji gundewarê Kobanî derkevin da ku koçber bi rehetî vegerin gundên xwe.
Duh li Helebê di navbera heyeta rêveberiya Kobanî û şandeya parêzgeha Helebê de civînek pêk hat. Endamên heyeta rêveberiya Kobanî vegeriya Kobanî û der barê hevdîtinê de ji bo ANHAyê axivî.
'Me Xwest Rûpelek Nû Vekin'
Endamê şandeyê Ebdulrehman Demir diyar kir ku şêniyên Kobanî li benda nîqaşên li Helebê ne û got: “Zimanê lihevkirin û diyalogê li pêş bû. Me xwest em rûpela derbasbûyî bigirin û yeke nû vekin, ji bo ku em Kobanî bi hev re bi rê ve bibin, ewlekarî û saziyên wê em bi hev re bi rê ve bibin.”
Mizgîn Xelîl jî der barê hevdîtinê de wiha got: “Li ser esasê vexwendina parêzgeha Helebê ya girêdayî hikumeta Şamê ya Sûriyeyê em çûn Helebê. Piştî peymana ku di 30'ê Çileyê hatiye çêkirin, yek ji xalên wê peymanê ye ku Kobanî wekî sîstema berê ji aliyê rêveberiyê û ewlekariyê ve girêdayî parêzgeha Helebê be. Ji ber vê jî ji bo kar û pirsgirêkan em cara yekem derbasî parêzgeha Helebê bûn.”
'Me gelek mijar nîqaş kirin'
Mîzgîn Xelîl bal kişand ser hevdîtina ku pêk hatiye û wiha got: “Divê hêzên leşkerî ên girêdayî hikumeta Şamê ku niha di gelek gundewarên Kobanî de ne, derkevin da ku koçberên li Kobanî bi rehetî derbasî gundên xwe bibin. Her wiha li ser gelek pirsgirêkên din û dorpêça ku em niha tê de ne û gelek pêdiviyên rojane, av, elektrîk û gelek pirsgirêkên jiyanî jî derdikevin holê. Bêtir îşaret bi cudabûna ku di Sûriyeyê de hate kirin ev cudahiyên di nava Sûriyeyê de bi xwe re zengînbûnekê tînin ku mirov bêtir parastina van bike û bi aramî bijî, dûrî dijminatî, şer, pevçûn û aloziyan.”
**

Heyeta Rojava û Barrot li Hewlêrê çi axivîn?
Duh Fermandarê Giştî yê HSD'ê Mazlum Ebdî, Hevseroka Daîreya Têkiliyên Derve ya Rêveberiya Xweser Îlham Ehmed û endama Fermandariya Giştî ya HS'Dê Rohilat Efrîn duh li Hewlêrê ligel Wezîrê Karên Derve yê Fransayê Jean Noel Barrot civiyan.
HSD'ê îro li ser vê daxuyanî da. Va ne hin gotinên ji daxuyaniyê:
- Teqezî li ser hat kirin ku divê peyman bi temamî were bicihanîn. Berdewamiya têkoşîna hevbeş a li dijî rêxistina DAIŞ'ê, mîsogeriya ewlehî û navendên ragirtina çekdarên rêxistinê û malbatên wan hatin nîqaşkirin.
- Teqezî li ser girîngiya parastina taybetmendiyên herêmên Kurdan û parastina mafên gelê kurd ê li Sûriyeyê hat gotûbêjkirin.
- Meseleya entegrasyona YPJ'ê di nav de mijara entegrasyona hêzên leşkerî û ewlekariyê de bi hemû hûrgiliyên xwe hatin nîqaşkirin ku bikeve xizmeta ewlehiya tevahî herêmê.
- Di civînê de bal kişand ser girîngiya vegera koçberan li herêmên xwe, bi taybetî yên Efrîn û Serêkaniyê, girîngiya beşdariya çalak li ser asta nîştimanî da ku çareseriyeke siyasî ya giştî pêk were ku mafên hemû pêkhateyên gelê Sûriyeyê mîsoger bike. Fermandarê Giştî yê HSD'ê pesnê rola erênî ya Fransayê di vê pêvajoyê de da, ku piştgirî da hewldanên aştî û îstiqrarê.

**

Heyetên leşkerî yên HSD û Şamê dicivin
Ji bo bi cih anîna peymana di navbera Rêveberiya Xweser û Hikumeta Demkî ya Sûriyeyê de hefteya borî du heyetên Şamê hatibûn Hesekê û Qamişloyê. Heyetan têkiliyên pêşerojê yên Rêveberiya Xweser û Hikûmeta Navendî nîqaş kiribû.
Ew dê niha jî mijara entegrasyona leşkerî nîqaş bikin.
Li gor agahiyan di demek kurt de heyetên leşkerî wê bên ba hev û li ser şêwazê têkilî û tevlêbûna HSD'ê di nav artêşa Sûriyê bê nirxandin. Îhtîmal e îro ev heyet bên ba hev.
**
Mesûd Barzanî û Mazlûm Ebdî hatin ba hev
Heyeta Rojava ya ku ji Fermandarê Giştî yê Hêzên Sûriya Demokratîk (HSD) Mazlum Ebdî, Hevseroka Daîreya Pêwendiyên Derve ya Rêveberiya Xweser Îlham Ehmed û endama Fermandariya Giştî ya Yekîneyên Parastina Jin (YPJ) Rohilat Efrîn pêk dihat duh çûbû Hewlêrê. Heyek îro bûn mêvanê Serokê Giştî yê PDK'ê Mesûd Barzanî
Di hevdîtinê de li ser peymana di navbera HSD û Hikûmeta Demkî ya Sûriyeyê de axivîn.
Heyet duh ligel Serokê Herêma Kurdistanê Nêçîrvan Barzanî û ligel Wezîrê Karên Derve yê Fransayê Jean-Noel Barrot jî hatibûn ba hev.