DiyarName.Com

Gava pêşî ji Amedê hat: Hevşaredar û endamên meclisan meaşên xwe dan Kobanî

Dîrok: 28/01/2026

AMED
Li Amedê hevşaredar û endamên meclisên şaredariyên DEM Partî meaşên xwe yên mehekê ji bo piştgiriya kampanyaya piştgiriya Kobanî bexşandin.

Piştgiriyên alîkariya mirovî ji bo Rojava bê navber berdewam dikin. Platforma Parastin û Hevgirtinê ya Bajarê Amedê di çarçoveya seferberiya alîkarî ya mirovî de “Kampanyaya Alîkariya Mirovî ya Lezgîn ji bo Kobanî” dabû destpêkirin. Di çarçoveya kampanyayê de hevşaredar û endamên meclisên şaredariyên DEM Partiyê li Amedê li Navenda Kongreyê ya ÇandAmed civiyan.
Hevşaredarê Şaredariya Bajarê Mezin a Amedê Dogan Hatun, hevşaredarên navçeyan û endamên meclisê beşdarî civînê bûn. Di civînê de, hevşaredaran biryar da ku meaşên xwe yên mehekê bexşî Kobanî bikin. Her wiha endamên meclîsan jî tevlî vê kampanyayê bûn û meaşên xwe bexş kirin.

‘Werin em vê agirê vemirînin’
Hevşaredarê Bajarê Mezin Dogan Hatun got ku hemû Rojhilata Navîn di nav xeleka agir de ye û wiha dom kir, “Ev agir di serî de armanc dike ku kurdan bişewitîne. Em kurd av in li ber vî agirê ku li ser Rojhilata Navîn ketiye. Em ê hemû agiran vemirînin. Gelên bindest ên Rojhilata Navîn, bibin mîna gelê kurd; werin em hemû bi hev re biherikin û vî agirî vemirînin. Ew agir îro şer e. Ew agir hêzên navneteweyî ne; ew çeteyên Rojhilata Navîn in. Lê av aliyê aştîxwaz e. Em dixwazin li ser axa xwe, mîna ava bi rûmet, bi azadî bijîn.”

Dilê me yek e, xwîna me yek e’
Dogan Hatun bi bîr xist ku bajarê Kobanî di bin dorpêça çeteyên HTŞ'ê de ye û got, “Heta ava vexwarinê ya xelkê Kobanî jî hatiye qutkirin. Elektrîk jî hatiye qutkirin û dixwazin xelkê li wir bi sermayê bikujin. Dilopek av jî nadin wan; dixwazin xelkê bi tîbûnê bikujin. Wekî rêveberiyên herêmî yên Amedê, me îro biryarek daye. Heta ku xelkê me yê li Kobanî û tevahiya herêmê ji vê zehmetiyê rizgar bibin em ê hemû çalakiyên xwe li vir bi hevgirtina bi wê herêmê re bikin. Xelkê wir hemû bira, dê, bav û hevalên me ne. Dilê me yek e, xwîna me yek e.”

‘Hûn agir bin em jî av in’
Hevserokê Şaredariyê Hatun got wan di civînê de biryarek daye û ew biryar ragihand: “Em vê mehê hemû meaşên xwe didin piştgiriya gelê Kobanî. Bi vî pereyî em ê ji wan re av, şîr ji bo zarokan, cil ji bo zarokan bikirin; em ê sobe û êzingan ji wan re bikirin heta ku ji van şert û mercên dijwar derbas bibin. Bila hêzên hegemonîk bizanin ku em kurd di serî de ji bo xwe, lê di heman demê de ji bo hemû gelan jî azadiyê dixwazin. Em şer naxwazin. Bila yên ku dixwazin me bikujin bizanin ku heke hûn agir bin, em jî av in. Em ê li ber xwe bidin, em ê nehêlin zarok ji cemidandinê bimirin. Divê her kes, bi taybetî gelê me, hişyar be. Ev komployek navneteweyî û giştî ye. Divê em li dijî vê komployê rabin. Em li kêleka gelê xwe ne û em li dijî şer in.”

Hin nûçeyên eleqedar:

- Hemû Festîvalên Fîlman ên Kurdan banga piştgiriya Rojava kirin

- Li Başûr weşana Al-Jazeera, Al-Arabiya û Al-Hadath hat rawestandin

- Mike Pompeo: Bila DYA piştgiriya xwe ya ji bo HSD'ê bidomîne

- Le Monde: 400 kesayetên navdar banga ‘parastina Rojava’ kirin

- Bakirhan 'Bila ev lîstika 100 salî bê şikandin',
Ozel 'Bila Deriyê Sînorê ê Murşîdpinarê vekin'

- 27'ê mehê, agahiyên li ser Rojava..

- Senator Graham li ser kurdan dîsa Trump hişyar kir

* 26'ê mehê, agahiyên li ser Rojava...

- 1'ê Reşemî wekî 'Roja Rojava ya Dinyayê' hat ragihandin

- Mazlum Ebdî: Hevdîtin didomin, Artêş wê nekeve Herêmên Kurdan

- 25'ê mehê, agahiyên li ser Rojava