DiyarName.Com

4'ê mehê, agahiyên li ser Rojava...

...ev tê nûkirin...

Bêrîvan Aymaz û Mesûd Barzanî hatin ba hev
- Serokê PDK'ê Mesûd Barzanî pêşwaziya li Cîgira Serokê Parlamentoya Nordrhein-Westfalenê ya Almanyayê Bêrîvan Aymazê kir. Baregeha Barzanî agahiya hevdîtinê belav kir.
Li gor daxuyaniyê Aymazê sipasiya Barzanî kiriye ji bo xwedî li doza Rojava derketiye.
Barzanî jî ji bo xebatên wê yên li Almanyayê ew pîroz kiriye û jêre serketin xwestiye.
Li aliyê din Berivan Aymazê li ser hesabê xwe yê X7ê jî wêneyê xwe û Barzanî belav kir û got, "Bi hevdîtina cenabê Serok Mesûd Barzanî re serbilind bûn."

Heyeta bijîşkên Başûr çû Qamişloyê
Heyeta bijîşkên ji Başûr ku ji 19 kesan pêk tê 1'ê vê mehê ji Hewlêr u Silêmanî derbasî Rojava bûbû. Heyeta ku 2 rojan li nava birîndar û koçberên li bajarê Dêrikê geriyan û destek da saziyên tenduristiyê îro jî derbasî bajarê Qamişlo bû.
Bijîşk destpêkê serdana Nexweşxaneya Dil û Çavan a Qamişloyê kir û paşê derbasî Meclisa Rêveber a Kantona Cizîrê bû û bi hevserok û rêveberên kantonê re civînek li dar xist.
Heyet wê ligel saziyên tenduristiyê yên bajêr li nava birîndarên berxwedanê û koçberan bigere.
*

Heyeta hunermendan ku çû Rojava: Xeterî bi temamî bi dawî nebûye
Hunermend Diyar Dêrsim, Hozan Şemdîn, Luqman Selîm, Rênas Zey û gelek rojnamevan piştî vegera xwe ji Rojavayê Kurdistanê îro gihîştin Başûr û daxuyanî dan çapemeniyê.
Va ne çend gotinên wan:
Hunermend Diyar Dêrsim: Êrîş, planeke mezin û hovane li dijî Rojava pêk hat.
Xeterî bi temamî bi dawî nebûye, divê her kes bi çavên vekirî razên, ji ber ku dijmin ranaze. Em bang dikin ku berxwedana gel berdewam bike. Armanca vê koma hunermendan ew e ku bêjin kurd yek in. Ji ber ku hunermend dikarin ji siyasetmedaran bêhtir bigihîjin dilê gel.
Hunermend Luqman Selim; Me hunermendan peyama berxwedana parçeyên din ên Kurdistanê gihand Rojava. Ev piştgiriya kurdan, bi taybetî li başûrê Kurdistanê, bû sedem ku cîhan li ser mijara Rojava baxive û piştgiriyê bide berxwedana ku li wir tê lidarxistin.
Hozan Şemdîn: Kurdan di navbera xwe de sînor nehiştin. Medyayê hişyariya zêdetir di nav gel de zêde kir, ku berxwedana Rojava kir mijarek girîng a cîhanî, rola girîng a medyayê û yekîtiya gelê kurd teqez kir.”
*

Kompaniya Amerîka û Qeterê wê li Sûriyeyê petrol û gazê derxin
Kompaniya enerjiyê ya Amerîkayî Chevron û kompaniya Qeterê Power International Holding ligel Şamê li hev kir ku li sûriyeyê ji bo petrol û gazê vekolînan bikin.
Peyman li Qesra Serokatiyê ya Şamê hatiye îmzekirin.
Ajansa girêdayî hikumeta demkî ya Sûriyeyê ev agahî ragihand. Ajansê got ku ev projeya yekemîn a girêdayî zeviya deryayî li Sûriyeyê ye.
*

Parêzger Nûredîn Ehmed: Em vê rojê li gelê xwe û malbatên şehîdan pîroz dikin
Parêzgerê Hesekê Nûredîn Îsa Ehmed bi coşek mezin ji hêla gel ve li Çerxerêya Kevokê ya bajêr hat pêşwazîkirin.
Parêzger Nûredîn Ehmed ji bo çepemenî got: "Em vê kêliyê û vê dema niha jiyan dikin li tevahî gelê hazir, malbatên şehîdan, hevalên me yên birîndar û yên di mewziyan de pîroz dikin, vê destkeftiyê li tevahiyan pîroz dikin. Ev cara yekemîn e parêzgerê parêzgeha Hesekê kesekî kurd e. Ev jî bi keda şehîdan, welatparêz, gelê me yên hundirîn û yê li derve ku bi salan e ked ji bo vê rojê da pêk hat. Em dîsa vê rojê li tevahî malbatên şehîdan, gelê me, tevahî pêkhateyên di parêzgeha Hesekê de, bi kurd, ereb, suryan, xiristiyan û êzidiyên wê ku 14 sal e ked da, pîroz dikin. Em ê li ser yekîtiyê û hevgirtina pêkhateyan bixebitin. Saziyên xwe ji bo xizmeta gel xurt bikin."
*

Li Qamişlo 90, li Hesekê 100 hêzên Sûriyeyê hene
Rêveberê Asayîşê Mehmûd Xelîl (Siyamend Efrîn) ji bo Ronahî TV qala biryarên entegrasyonê û rewşa dawî kir. Xelîl wisa gotiye:
- Gava yekem rawestandina şer bû. Gİava duyem derbasbûna Hêzên Ewlekariyê yên Wezareta Navxweyî ji bo Qamişlo û Hesekê bû.
- Niha li Qamişloyê 90 hezên endamên Ewlehiya Şamê hatine bi cih kirin. Li Hesekê jî 100 kes hatine bi cih kirin.
- Gava sêyem pevguhartina dîlgirtiyan û vekişîna hêzên leşkerî ye.
- Pêre jî dê dorpêça li ser Kobanî bidawî bibe.
*

Ji bo Waliyê Kurd merasima pêşwaziyê li dar dikeve
HSD'ê ji bo Walîtiya Hesekê navê Nûredîn Îsa Ehmed pêşniyar kiribû. Hat gotin ku Şara ev yek qebûl kiriye û Ehmed niha hevdîtinên xwe yên li Şamê temam kirine û ewê vegere Hesekê.
Li gor agahiyê Hêzên Ewlekariyê yên Hesekê ji bo Walî Nûredîn Îsa Ehmed wê merasima pêşwaziyê li dar bixin. Asayiş wê li herêma Devera Kevorê pêşwazî bike.
*

Li Kobanê 14 stasyonên avê naxebitin
Saziya Avê ya Kobanî îro bi daxuyaniyeke çapemeniyê got ku ji ber qutkirina elektrîkê 14 stasyonên ava vexwarinê kar nakin.
Ji ber ku dorpêça li Kobanî didome, elektrîk qutbûyî, pêşî li şandina alîkariyê digirin, gelê Kobanî di nav zehmetiyê de ye. Yek ji pirsgirêkên sereke jî pirsgirêka avê ye.
Saziya Avê ya Kobanê li pêş Şaredariya Gel a Kobanî daxuyanî da. Hevseroka Saziya Avê Zozan Xelîl wisa got,
- Ji ber qutkirina elektrîkê 14 stasyonên avê naxebitin.
- Nêzî 20 rojan e navenda Kobanî û gundê wê bê av mane.
- Ev yek bandorê li 500 hezar kesî dike
- Sozên ku ji bo dayîna elektîrê hatiye dayîn jî naynin cih.
*

Gelê Kobanî ji bo parastina destkeftiyan meşiyan
Gelê bajarê Kobanî ji bo parastina destkeftiyên şoreşê daketin qadan û meşiyan. Bi hezaran kes beşdarî meşê bûn. Meşvanan pankarta “Şoreşa me rûmeta me ye, em ê rûmeta xwe biparêzin” vekirin û li dû meşiyan.
*

Zarokên dibistanan ji bo Rojava pêşangehek vekirin
Xwendekarên asta seretayî û amadehiyê li Silêmanî pêşangehek vekirin ku îsal pêşkêşi Rojava kirin.
Xwendekarên
Xwendekarên Dibistana Perwerdehiya Rojhilat a Silêmaniyê her sal vê pêşangehê lidar dixin, îsal ji bo piştgiriya rojavayê Kurdistanê amade kirin.
Rêveberê çalakiyên hunerî yê dibistanê Birwa Namiq Hesen diyar kir ku ji bo rêzdariya berxwedana rojavayê Kurdistanê pêşengeh vekirine û wiha dom kir: “Em dixwazin nifşê nû hişyar bikin ku êrîşên li ser gelê kurd bizanin û hestên neteweyî zindî bibin. Me hestên neteweyî di pêşnageha xwe de daye nîşandan. Ji ber ku me dît bê cudahî hemû kurdan piştgirî da berxwedana Rojava.”

*

Tirkiyeyê nehişt 25 tir herin Kobanî
Platforma Parastin û Hevgirtina Bajêr a Amedê 5 roj berê 25 tirên alîkariyê ji bo Kobanî şandibûn. Ev tir ev 5 roj bûn li Sirûcê li ber deriyê Murşîdpinarê sekinîbûn, lê dewleta Tirkiyeyê destûr neda derbasî Kobanî bibin. Li ser vê yekê tir vegeriyan û duh êvarê gihîştin Amedê.
Ji bo tir bikevin Kobanî DEM Partî li Meclisê û li cem rayedaran hevdîtin pêk anîn, lê encam neguherî.

Hunermendên Rojava bangî hunermendên din ên kurd kirin
Endamên Tevgera Çand û Hunera Demokratîk a Mezopotamyayê (TEV-ÇAND), Tevgera Hîlala Zêrîn a Çanda Jinan, Desteya Çand û Ronakbîriyê, Meclisa Wêjeyê û Yekîtiya Hunermendan li Qamişloyê, li ber Navenda Çand û Hunerê ya Mihemed Şêxo hatin ba hev û daxuyanî dan çapemeniyê.
Hunermenda got ku rola hunermenda roleke sereke ye û banga hemû hunermendên kurd ên li her derê dinyayê kirin û got ku rola xwe bi cih bînin.

Hin nûçeyên eleqedar:

- 3'yê mehê, agahiyên li ser Rojava

- Îro 'pêvajoya entegrasyonê' dêst pê kir, niha çi tê kirin, wê çi bibe?

- Rêza leşkerî çawa ye? Tûgayên HSD'ê wê ji çend kesî pêk bên?

- Heta niha 500 kamyon gihîştine Rojava (Va ne agahiyên herî dawî)

- Nûredîn Îsa yê wekî Waliyê Hesekê hatiye diyarkirin kî ye?

- Mazlum Ebdî: Artêş wê nekeve gund û bajarên kurdan

- Ji bo peymana HSD û Şamî kî çi got?

- Nadiya Mûrad li NY'yê daxwaz kir: Bila Şengal û Kobanî bê parastin

- Va ne xalên peymana HSD û hikumeta Sûriyeyê

- Balyozê Îsraîlê serdana ofîsa Rêveberiya Xweser a Berlînê kir

- Du senatoran pêşnûmaya "Zagona Parastina Kurdan" pêşKêşî senatoyê kir