Helebçe

Li Helebceyê 1’emîn Sempozyoma Şêwekarî bi tevlîbûna gelek hunermendên şêwekar hat lidarxistin. Di sempozyomê de hunermendan bi tabloyên xwe îşaret bi komkujiya Helebce, Şengal û Enfalê kirin.

Berêvarkî li Salona Rêveberiya Giştî ya Rewşenbîrî û Hunerî ya Helebceyê 1’emîn Sempozyoma Şêwekarî bi tevlîbûna gelek hunermendên ji bajarên cuda yên Herêma Kurdistan û Iraqê hat lidarxistin.

Hunermenda Şêwekar Çîmen Îsmaîl ku ew jî bi tabloyên xwe tevlî sempozyomê bûye, got: “Yekem car e li Helebce karek wiha yê hunera şêwekarî tê lidarxistin. Hunermendên ku bi tabloyên xwe tevlî pêşangehê bûne her yek ji wan bi rengek heskirina xwe ya ji vî bajarî re nîşan didin.”

Çîmen da zanîn ku wê di tabloyên xwe de cih daye komkujî û êşên Helebce, Şengal û Enfalê. Çîmen got, “Tabloyên ku min îro çêkirine li ser êş û nexweşiyên ku bi serê gelê kurd de hatine ne.”

Hunermend Saman Ebobekir jî da zanîn ku hemû hunermendên tevlî sempozyomê bûne, her yek li gor heskirina xwe tabloyan xêz dikin û dixwazin wisan pêşkêşî Helebceyê bikin. Her wiha got, “Pêwîstiya Helebceyê ji bilî avahî û rêyan, di heman demê de pêwîstiya wê bi avahiyên hunerî, şêwekarî, şano û sînemayê jî heye.

Rêveberê Giştî yê Rêveberiya Rewşenbîrî ya Helebceyê Mihemed Fetah jî got, “Em hertim dixwazin karên baş pêşkêşî Helebceyê bikîn. Îro yekemîn sempozyoma şêwekarî li Helebceyê tê lidarxistin. Karek yê destê hunermendên ji bajarên cuda yên Iraq û Herêma Kurdistanê ye. Hemû bi hev re tevlî bûne.”

Rojnews