Diyarname

Li Sudanê pevçûn didomin. Neteweyên Yekbûyî (NY) eşkere kir ku heta niha ji 334 hezarî zêdetir kesî Sûdan terk kiriye.

Di navbera artêşa Sûdanê û hêzên çekdar RSF (Hêzên Piştgiriya Lezgîn) de ji 15'ê avrêlê ve pevçûn didomin. Her çiqas van rojên dawî şerawestin hat kirin jî lê fêde neda. Loma jî li Paytexta Sûdanê Hartûmê pevçûn xurtir bûne. Tê gotin ku heta niha ji 500 kesî zêdetir mirov mirine û bi 4 hezarî zêdetir kes jî birîndar bûne.

Li aliyê din welatên derve hemwelatiyên xwe ji welat derdixin. Ligel van kesên derfetên wan hene jî welatê xwe terk dikin. NY'yê li ser vê yekê agahiyeke belav kir û got ku heta niha ji 334 hezarî zêdetir mirovan welat terk kiriye.

Li aliyê din dîrektorê herêmê yê WHO'yê (Rêxistina Tenduristiyê ya Dinyayê) Ehmed el Mandharî got ku tesîsê tenduristiyê jî rastî êrîşê hatine û ew der wekî baregeha navendî hatine bikaranîn. Mandhari got ku heta niha 26 caran êrîşê li van cihên tenduristiyê hatiye kirin, di êrîşan de xebatkarên tenduristiyê û sivîl mirine.

Pevçûnan çawa dest pê kiribû?

Li Sûdanê artêş di bin fermana Serokê Konseya Ewlehiyê Orgeneral Abdulfettah el-Burhan de ye. RSF jî di bin destê cîgirê serokê konseyê Orgeneral Mohammed Hamdan Dagalo de ye.

El-Burhanî ji bo li hemberî serhildêran RSF ava kiribû. Ji bo RSF bi serê xwe tevnegere El-Burhanî bang li wan kiribû ku beşdarî artêşê bibe. Lê Dagolo dijî vê yekê derketibû û wî jî xwestibû ku bila rêveberiyeke sivîl çêbe û ev yek pêk bê. Di vê xirecir û qayişkêşanê de 15'ê mehê di navbera Artêş û RSF'ê de pevçûnan dest pê kir. Hefteyek berê Erebistana Siûdî û DYA ketin navberê û şerawestin saz kirin. 1'ê gulanê bi hewldana wan 72 saetên din ev şerawestin dirêj kirin, lê pevçûn dîsa ranewestiyan.

Sûdan welatekî li Bakurê Rojhilatê Afrîkayê ye, navê wê yê fermî Komara Sûdan e. Paytexta wê Hartum e. Li Sûdanê du zimanê fermî hene erebî û îngilîzî. Di sala 2011'an de Başûrê Sûdanê ji wan veqetiya. Sûdana niha mijara me ye nifûsa wê 45.7 mîlyon e.

Abdulfettah el-Burhan ku Serokê Hikumeta Federal e, Muhammed Hamdan Dagalo jî cîgirê wî ye.