Sîma BORKÊ / QAMIŞLO

Dîwana Wêjeyê ya Bakur û Rojhilatê Sûriyeyê û Desteya Çandê ya Herêma Cizîrê amadekariyên lidarxistina 7`emîn Mîhrîcana Osman Sebrî ya Wêjeyê dikin. Komîteya amadekar a mîhrîcanê şert û mercên beşdarbûna pêşbirka mîhrîcanê ragihandin.

Mîhrîcan li ser asta Kurdistan û Bakur û Rojhilatê Sûriyeyê pêk tê. Pêşbirka mîhrîcanê tenê li ser helbestan e; her beşdarek dikare bi berhemekê beşdar bibe, temenê beşdaran divê ne kêmî 18`an be û berhem bi zimanên kurdî, erebî û suryanî bin. Her wiha divê berhem li tu deran nehatibin weşandin. Yên bixwazin berhemên xwe bişînin divê heta 1'ê îlona/rezbera 2023’yan bişînin ber destên amadekaran.

ROJA MÎHRÎCANÊ HAT GUHERANDIN

Mîhrîcana Osman Sebrî ya Wêjeyê her sal roja 11'ê cotmehê/kewçêrê dihat lidarxistin, lê îsal guherandin û dê roja 1'ê mijdarê/sermawezê were lidarxistin. Têkildarî mijarê berdevka Dîwana Wêjeyê ya Bakur û Rojhilatê Sûriyeyê Narîman Evdikê da zanîn ku wan ji ber rasthatina salvegera dagirkirina Serêkaniyê (9`ê Cotmehê) û salvegera şehadeta Sekretera Giştî ya Partiya Sûriyeya Pêşerojê ya berê Hevrîn Xelef (12`ê Cotmehê), dema lidarxistina mîhrîcan hatiye bipaşxistin.

Temaya pêşbirka 7`emîn Mîhrîcana Osman Sebrî ya Wêjeyê ‘Helbestvan û Nivîskarê Kurd Melayê Cizîrî’ ye.

Narîman Evdikê got li Bakurê Kurdistanê û Tirkiyeyê hin alî li ser Melayê Cizîrî bi rapor û lêkolînên nerast derdixin û hewldanên dûrxistina wî ji kurdbûnê hene, ji lew re wan sala 2023`yan li rojavayê Kurdistanê kir sala Melayê Cizîrî.

Melayê Cizîrî ji navçeya Cizîra Botan a Şirnexê ye û di navbera salên 1570-1640 de jiyaye.

BERHEM DÊ BÊNE XELATKIRIN

Beşdarên ku berhemên ku dê di pêşbirkê de serkeftî bin, dê şahiyên îmzekirinê jê re bên lidarxistin, berhemên wan jî dê li ser navê "Weşanên Mîhrîcana Osman Sebrî" bên çapkirin û belavkirin. Ev gav ji bo avakirina pirtûkxaneyek bi navê Osman Sebrî ye.

Narîman Evdikê destnîşan kir ku îsal dayîna xelatan li ser 3 astan e; helbestvanê/a yekemîn diyariyeke darayî tevî hejmareke pirtûkan, diyariyên astên duyemîn û sêyemîn jî pirtûk in û wiha got: “Nirxandin li gorî asta berheman e, dibe ku pêşbirk bê rakirin jî heke berhem ne di asta baş de bin.”

Narîman da zanîn ku 7`emîn Mîhrîcana Osman Sebrî ya Wêjeyê dê li Qamişlo li dar bikeve lê wan hîna bernameya mîhrîcanê diyar nekiriye.
Ji bo yên bixwazin berheman bişînin:
E-maîl: f.osmansebri20@gmail.com
Whatsapp: (00963) 937465219 e.

ANHA 

***