Yekem tîma ji komê derket diyar bû

Diyarname
Di tûrnûvaya Euro 2024'an de maçên duyem ên koman îro dest pê dikin. Albenia û Hirvatistan bi 2-2'yan ji sehayê derketin. Almanya û Macaristan, Skoçya û Swîsre wê bi hev re bilîzin
90+5 de pûan hatin parvekirin
Di Koma B de maça yekemin di navbera Albenia û Hirvatistanê de bû. Maça bi heyecan bi 2-2 bi dawî bû.
Maça li Stada Volksparkê di deqîqeya 11'an de bi gola lîstikvanê Albeniayê şikil guhart. Laci di deqîqeya 11'an de gol avêt û tîma xwe bir 1-0'ê. Ji bo Hirvatistanê nîveka yekemîn têra guhartina skorê nekir. Di nîveka duyemîn de atakên Hirvatistanê dom kirin. Hirvatan di deqîqeya 74'an de bi Kramaric bersiv da, du deqe paşê lîstikvanê Albeniayê Gjasula gol avêt keleha xwe û hirvat bi 2-1 derketin pêş. Gjasula wê kêliyê rastî bêsiûdiyê hatibû, di deqîqe 90+5 de bi gola ku avêt xwe efû kir: 2-2.
Her du tîman her yekê pûanek girt û hêviyên xwe hiştin maça sêyemîn.

Yekem tîma ji komê derket diyar bû
Alman ji komê derketin, Deniz jî li sehayê bû
Di maça Almanya û Macaristanê de Almanyayê bi golên Jamal Musiala (dq 22) û İlkay Gundogan (dq 67) bi 2-0 bi ser ket. Bi vê serketinê Almanya bû 6 pûan û bêyî pêdivî bi lîstina maça sêyemîn bibine mafê derketina ji komê bi dest xist.
DENÎZ Ê KURD DERKET SEHAYÊ
Lîstikvanê tîma alman Deniz Undav di deqîqeya 84'an de ket cihê İlkay Gundogan. Undav ku kurd e bû cara sisêyan formaya tîma neteweyî ya Almanyayê li xwe dike.
Denîz Undav ku li Stutgartê dilîze, îsal di Bundesligayê de 18 gol avêtibûn.
Macaristana ku di her du maçên lîstiye de têkçû, derketina wê ya ji komê ket talûkeyê.
NEUER GIHÎŞT BUFFON'î
Qeleparêzê alman Manuel Neuer îro derket maça 17'emîn a tûrnûvayên Euroyan. Bi vê yekê gihîşt hejmara qeleparêzê îtalî Gianluigi Buffon.
Qeleparêzê 38 salî îro qeleparêzê Hollandayê Edwin van der Sar û yê Portekîzê Rui Patricio li dû xwe hişt. Di maçek din de Neuer formayê li xwe bike dê Buffonî jî li dû xwe bihêle.

Swîsreyê hêviya xwe pişt maça dawî
Maca dawî ya komê di navbera Swîsre û Skoçyayê de bû. Di deqîqeya 13'yan de Schar ê skoçyayî gol avêt keleha xwe û Swîsre 1-0 derket pêş. Di deqîqeya 26'an de Shaqiri gölek xweş avêt û encam anî 1-1'ê.
Bi vê encamê Swîsre bû xwedî 4 pûanan û li dû Almanyayê (6 puan) duyemîn e. Skoçyayê bi yek pûanî sêyemîn û Macaristan qet pûanên wê tune ne.
Di maça dawî ya komê de Almanya û Swîsre, Skoçya û Macaristan bi hev re dilîzin.
Almanyayê mafê derketina komê bi dest xist, tîmê duyemîn dê diyar bibe.

Not: Li Tirkiyeyê maç ji aliyê TRT 1'ê ve yekser têne belavkirin.