Di Koma E de her tişt tevlihev bû: 3-3-3-3

Diyarname
Îro di Koma E de maçek heye: Belçika û Romanya tên hemberî hev. Di Koma F de Gurcistan û Çekya bi 1-1'ê man, Portekîzê Tirkiye bi 3-0 têk bir
Gurciyan û çekan pûan parve kirin
Di maça Gurcistan û Çekya de pûan hatin parvekirin, ji bo her du tîman jî hemû hêvî ma maça sêyemîn.
Di deqîqe 45+4 de li ser navê Gurcistanê ji penaltiyê Georges Mikautadze gol avêt: 1-0. Çekyayê di deqîqeya 59'an de bi Patrik Schick bersiv da: 1-1.
Bi vê encamê her du tîman jî di komê de pûanên xwe yên pêşî girtin.

Portekîzê ji Tirkiyeyê re got: 'Ez ne Gürcistan im'
Tiriyeya ku di maça yekem de li hemberî Gurcistanê bi ser ketibû, digot qey, qet nebe ewê ji Portekîzê jî pûan an jî pûanan bigire. Lîstikvanên Tirkiyeyê bi vê defhdanê ketin sehayê, di çend deqîqeyên pêşî de xwestin xwe nîşan bidin lê na. Li hemberî wan ne Gurcistan, Portekiz hebû.
Portekîzê xwedî lîstikvanên mezin ji Ronaldo heta Pepe, ji Bernardo Silva heta Bruno Fernandes û yên din...
Di deqîqeya 22'yan de Bernardo Silva ji dûr ve bi şid gog şand nava torê: 1-0. Piştî golê mekanizmaya Tirkiyeyê xira bû; tirs ketibû dilê û di deqîqeya 29'an de ji vê yekê Samet Akaydin goga ku dixwest bi paş ve bide qeleparêzê xwe Altay, lê gog çû nava kelehê: 2-0. Û di deqîqeya 59'ê de Ronaldo nîşan da ku çiqas lîstikvanekî mezin e: Ronaldoyê ku gog jêre hat, hinek ajot, bi qeleparêzê Tirkiyeyê Altay ra rû bi rû ma, dikarî lêde, lê lêneda û gog da hevalê xwe yê vala: Bruno Fernandes; Û Fernandes pif bikira jî dê biçûya keleha vala ya li pêş wî: 3-0. Piştî vê kêliyê êdî maç xilas bûbû.
Bi vê yekê Portekîz bû xwedî 6 pûanan û beyî maça sêyemîn bilîze jî ji komê derket çû nav Dora 16'an. Di komê de Tirkiye xwedî 3 pûanan, Çekya û Gurcistan xwedî pûanek in.
26'ê mehê Tirkiye û Çekya, Gurcistan û Portekiz wê bilîzin. Ji bo Tirkiyeyê pûanek lazim e; Tirkiye bi ser bikeve yan wekhev bimîne dê ji komê derê. Lê Çekya bi ser bikeve raste rast dê wekî duyemînê komê ji komê derê. Maça din li gor serketina Gurcistanê dê şikil bigire.

Di Koma E de her tişt tevlihev bû: 3-3-3-3
Di Koma E de îro maça Belçika û Romanya hebû. Belçîkayê di deqîqeya 2'yan de bi Youri Tielemans gol avêt û serdestî girt destê xwe. Romanyayê ber xwe da, hinek firsend bi dest xistin lê Belçika her serketî bû.
Belçîkayê di deqîqeya 64'ê de ji linkê Lukaku golek di avêt lê bi milimetrik Lukaku ofsideyê de bû û gol betal kirin. Vê yekê hinek coş da Romanyayê lê têre nekir. di deqîqeya 80'yî de qeleparêzê Belçîkayê Casteelsî gogê dûr û dirêj avêt, raste rast gog çû ji bo Kevin De Bruyne û Bruyne efû nekir: 2-0. Bi vê yekê Belçîkayê 3 pûanên xwe yên pêşî girtin. Lê ya herî balkêş bi vê yekê wisa çêbû: Di komê de hemû tîm, Belçika, Romanya, Slovakya û Ûkrayna xwedî 3 pûanan in.
Roja 26'ê mehê maça dawî heye. Slovakya û Romanya, Belçika û Ukrayna tên hemberî hev. Tîma bi ser bikeve raste rast dê ji komê derê. Ger hemû tîm wek hev maçê bi dawî bikin dê li avarajan bê nêrîn.

Not: Li Tirkiyeyê maç ji aliyê TRT 1'ê ve yekser têne belavkirin.