Diyarname
Di salekê de BDP'ê li meclisê çi kir, partiyên din çi kir? Herî zêde kî civîna çapemeniyê li dar xist? Vane agahiyên li ser salekê Meclisa Tirkiyeyê:

Bû salekê bi ser hilbijartinê re derbas bû. Di vê salekê de de wekî partî herî zêde CHP'ê civînên daxiyaniya çapemeniyê li dar xistine. CHP'ê 362 civînên çapemeniyê li dar xistine. Piştî wê MHP bi 175, BDP jî bi 118 civînan tê. AKP tenê 41 û 18 civînên çapemeniyê jî mebûsên serbixwe li dar xistine.

Di warê mebûsan de jî herî zêde Wekîlê Serokê Koma MHP'ê Oktay Vural civîna çapemeniyê li dar xistiye. Vural 69 caran derketiye pêşberî çapemeniyê.
Digel Vural ji MHP'ê Ozcan Yeniçeri, ji CHP'ê Atilla Kart û Akif Hamzaçebi, ji BDP'ê jî Hasip Kaplan û Altan Tan herî zêde derketine pêşberî çapemeniyê û axivî ne.

Her wiha agahiyên taybet ên li ser BDP'ê jî hene. Ji bilî Kaplan û Tan performansa BDP'ê wisa çêbûye:

Hevserokê BDP'ê Selahattin Demirtaş got ku di salekê de performansa ku tu partiya muxalefetê nîşan nedaye wan nîşan daye, beşdarî raçavkirin û qanûnçêkirina bûne û ev agahî dan:

- Di salekê de 200 pêşniyarnameyên lêpirsînê dan Meclisê.
- 62 pêşniyarên qanûnan dan ku her yek li ser pirsgirêkên girîng ên Tirkiyeyê ne.
- Her roj li meclisê mafê axaftinê girtin û bikaranîn.
- Heta niha ji ber xebatên wan 672 fezleke der barê mebûsên BDP'ê de hatin amadekirin.
Demirtaş diyar kir ku ev yek helbet ne bes in û wisa dom kir: "Di 5 salên dawî de em xebata herî bandorker dikin lê em berî her tiştî xwe rexne dikin. Ji ber ku gelê me hê tiştên mezintir heq dike. Wan berdêlên mezin dan û nûneriya xwe teslîmê me kirin. Me nîşan da ku mebûsî ne statuyek e. Hevalên me di her warê jiyanê de nîşan da ku ew bi xwe gel in. Helwesta ku hevalên me di vê salekê de nîşan da li Tirkiyeyê lênêrîna li mebûsan guhart. Mebûsî êdî ji cihê meqamê derketiye û bûye cihê xizmetdayînê. Me nîşan da ku mebûs dikarin ne mebûsên bijareyan, berevajî vê bibin mebûsên gel.