Navenda Nûçeyan
Hevserokê Giştî yê BDP’ê Selahattîn Demîrtaş destnîşan kir ku, Parlementerê BDP’ê yê Rihayê Îbrahîm Ayhan dema sirgûnî girtîgeha Edeneyê kirine heqaret lê kirine. Demîrtaş da zanîn ku, Ayhan du caran spazma dil derbaz kiriye. Her wiha Demîrtaş anî ziman ku, wezaretekî ku îşkenceyê dike nabe navê Wezareta Edaletê be, bibe bibe navê wê wezîr û wezareta îşkenceyê ye.

Parlementerê BDP’ê yê Rihayê Îbrahîm Ayhan ku ji doza “KCK”ê di girtîgeha Tîpa E ya Rihayê de bû, di 20’ê Tîrmehê de bêyî vîna Ayhan sirgûnî Girtîgeha Tîpa F ya Edeneyê hatibû kirin. Di derbarê vê sirgûnê de Hevserokê Giştî yê BDP’ê Selahattîn Demîrtaş di Twîtterê de daxuyaniyek da û ragihand ku, dema Parlementer Îbrahîm Ayhan bi zorê neqlî girtîgeha Edeneyê kirin, di heman demê de tehda lê kirine.

Demîrtaş eşkera kir ku, Ayhan xistine hucreyekî yek kesî, sabûn, ventilator û pêwîstiyên şexsî nedane û her wiha du caran jî spazma dil derbas kiriye.

Demîrtaş destnîşan kir ku, di derbarê mijarê de li gel Wezareta Edaletê hevdîtin hatiye pêkanîn û daxwaz hatiye kirin ku, bilez dest ji vê îşkenceyê bê berdan. Her wiha şandeyekî ku ji parlementeran pêkhatî niha li girtîgehê ne. Dê serdan û vekolînê bikin.

Demîrtaş balkişand ser zilma AKP’ê û got; “Zilm û îşkenceya AKP’ê li derve jî, li hundir jî didome. Ez AKP’ê û wezîr şermezar dikim."

Demîrtaş li ser wezareta edaletê jî wisa nivîsî: “Wezaretekî ku bêyî ku bêje ev parlementer e îşkenceyê dike, nabe navê wê Wezareta Edaletê be, bibe bibe navê wezîr û wezareta îşkenceyê ye.”