___Can Elewî___
Di cîhana hunerê de, xêzkirin bedewiya jiyanê û hestên hunermend rave dikin. Ciwana bi navê Aya Omer bi firçe û rengîn zeytî, êşa zarokatiya xwe rave dike. Tabloyên wê ne tenê xêzkirin in, lê alozî û têkoşîna wê bi şêwazekê ku her kes lê dibe heyran rave dikin. Aya bi gavên sabît rêya bidestxistina xewna xwe didomîne. Ew dibêje, "Ez hêvî dikim ku li ser dîwarên bajêr xêz bikim, ji bo ku bajar bedewtir bibe."
TABLOYA YEKEM 9 SALIYA XWE DE XÊZ KIR
Aye Omer (20) li bajarê Dirbêsiyê yê kantona Cizîrê mezin bûye. Ji biçûkaniya xwe ve ji xêzkirinê hez dike. Ruxmî ku teşwîqkirina derdorê kêm bû, lê bi israr bû ku xewna xwe bi cih bîne. Tabloya yekemîn a ku xêz kiriye bi navê "Dayîk û zarokek" bû. Temenê wê, wê demê 9 salî bû. Wê çaxê ew tablo diyarî dayîka xwe kir û bi rêya wê xwest hezkirina xwe ji dayîka xwe re nîşan bide.
XEWNA XWE DEWAM DIKE
Omer bi israr rêya xwe temam kir. Kî tabloyên wê dibîne dibin heyrana wê û bi saya teşwîqkirina mamsoteya wê, tev li peymangeha xêzkirinê ya li bajarê Qamişloyê bû.
Hunermend Aya Omer hevsengî di navbera xwendin û behreya xwe de çêkir. Ji ber wê behreyên xwe di bikaranîna pênûsê û rengan de bi pêş xist, fêrî hin hunerên destan û peykersaziyê bû.
Zarokatiya wê ne normal bû, ji ber ku ji malbata xwe dûr ket. Ji bo ku xemê xwe birevîne, hest û êşên xwe bi rêya firçe û rengan rave kirin. Di 9 tabloyên xwe de tenahiya xwe derbirand û çîrokên li ser dayîk û zarokan, xweza û rewşa jinan vegotin.
KET BIN BANDORA VAN GOGH
Omer ji bo ku behreya xwe bi pêş bixe, serî li xwendinê û lêkolînê da. Ew herî zêde heyrana hunermendê holandî Vincent Van Gogh bû nemaze tabloya wî ya navdar a bi sernavê "Şeva Stêran". Li gorî Omer, çîroka Van Gogh dişibe ya wê, ji ber wê bandora Van Gogh li ser Aya Omer gelek e.
Der barê zehmetiyan de, Aya Omer wisa got: "Ez di peydakirina madeyên xêzkirinê de zehmetiyên mezin dikişînim. Ji ber ku derfetên madî kêm in û ev made di nava sûkê de peyda nabin."
GAVÊN PÊŞEROJÊ
Ew behsa armancên xwe yên ji bo pêşerojê dike û dibêje: "Piştî ku ez ji peymangehê der biçim, hêvî dikim ku bibim mamosteya xêzkirinê. Dixwazin vê hunerê li bajarê Dirbêsiyê belav bikin. Li vî bajarî, gelek behre hene ku divê werin teşwîqkirin. Ez hêvî dikim ku li ser dîwarên bajêr xêz bikim, ji bo ku bajar bedewtir bibe."
Ew di dawiyê de wisa dibêje: "Divê ciwan zehmetiyan derbas bikin, hewldanên xwe bidomînin ji bo ku xeyalên xwe bi cih bînin. Divê vîna me xurt be û em behreyan keşf bikin û wan bi pêş bixin."
ANHA