Diyarname
Dema radyo derketibûn nîqaşa "dê rojnameyên qaxiz xilas bibin", dema televîzyon derketin jî heman nîqaş hatin kirin. Lê rojname hê weşana xwe didomînin. Dema E-pirtûk derketin jî li ser temenê pirtûkên çapkirî nîqaş derketin. Dê encam çi be ji niha de ne diyar e lê li gor îstatîstîkan di salekê de çar qat eleqeya ji bo e-pirtûkan zêde bûye.
Li dinyayê eleqeya ji bo e-pirtûkan gelek e. Ev hejmar gelek bi ser hejmara kesên li Tirkiyeyê e-pirtûkê dixwînin de ye. Lê digel vê yekê jî li Tirkiyeyê jî her ku diçe (li cem kurdan hê ev pêş neketiye) hejmara xwînerên e-pirtûkê zêde die.

Li DYA sedî 13 li vir hezarî de 4

Pirtûkfiroşê online idefiks li Tirkiyeyê di sala 2010'an de di tabletan de e-pirtûk bi navê "Kitaplik" pêşkêşî xwendevanan kir. Par hejmara kesên ku "Kitaplik" bikar aniye 4 qat zêde bûye û hejmara wan gihîştiye 150 hezar kesî. Lê dîsa jî di nav bazarê de ev hejmareke biçûk e.
Li Dewletên Yekbûyî yên Amerîkayê (DYA) sedî 13'yê bazara firotina pirtûkan di destê e-pirtûkê, para din di destê pirtûkên çapkirî de ye. Li Îngilistanê sedî 6 bazar di destê e-pirtûkê de ye, ev yek li Tirkiyeyê di hezarî de 4 e.

Her wiha idefiksê ragihandiye ku sedî 84'ê kesên ku "Kitaplik" bikar anîne xwendevanên ku nû bûne endamên idefiksê ne ku ev yek jî wekî "xwendevanên nû derketin holê" hatiye şirovekirin.

Amazon: Firotina e-pirtûkan zêdetir bûye

Li aliyê din Amazon ku li dinyayê malpera herî mezin a online a dan û standina tiştan e, agahiyeke nû ragihand. Amazonê diyar kir ku firotina e-pirtûkê ji firotina pirtûkên çapkirî derbas kiriye. Yanê di Amazonê de e-pirtûk ji pirtûkên çapkirî zêdetir hatine firotin.

Şîrketê roja 6'ê mehê agahî weşand û got ku ji serê 2012'yan heta niha beramberî her 100 pirtûkên çapkirî ku hatine firotin 114 e-pirtûk hatine firotin.