___Zekî Ozmen___
Daîreya Fedaral a ji bo Koçber û Penaberan (BAMF) îstatîstîkên serîlêdanên penaberiyê yên li Almanyayê yên 2024’an ji raya giştî re aşkere kir. Li gor van îstatîstîkan li Almanyayê di sala 2024’an de bi giştî 229.751 mirovan serî li mafê penaberiyê dan û ji van 48.256 kes kurd bûn.
LI GOR SALA BORÎ HEJMAR DAKETIN
Hejmara serîlêdanên penaberiyê yên 2024’an li gor 2023’yan daketin. Di sala 2023’yan de bi giştî 351.915 kesî serî li mafê penaberiyê dabû. Di sala 2022’yan de jî hejmara serîladanan 244.132 bûn.
PENABERÊN HERÎ ZÊDE JI SÛRIYEYÊ NE
Wekî gelek salên derbasbûyî, di sala 2024’an de jî piraniya kesên serî li mafê penaberiyê dane ji Sûriyeyê ne. Li gor îstatîstîkên BAMF´ê bi giştî 79.433 kesên ji Sûriyeyê di rêza yekemîn de cih girtine. Afganî di rêza duyemîn de ne û hejmara wan 36.156 kes in. Kesên ji Tirkiyeyê serî li penaberiyê dane bi 31.056 kesan dikevin rêza sêyemî. Iraq bi 9.046 kesan di rêza çaremîn de cih girtiye. Di rêza pêncemîn de 7.354 kesên ji Îranê hatine û di rêza şeşemîn de jî penaberên ji Somaliyê 5.817 hezar in.
HEJMARA KURDAN JÎ DAKET
Beramberî 2024’an ku 48.256 kurdên ji her çar parçeyên Kurdistanê li Almanyayê serî li penaberiyê dane, di sala 2023’yan de ev hejmar 85 hezar û 904 bû. Di 2022’yan de jî 47.900 kurdan li Almanyayê serî li mafê penaberiyê dabûn.
KURDÊN HATINE ALMANYAYÊ JI KÎJAN PARÇEYÊ NE?
Li gor îstatîstîkên me bi dest xistine piraniya kurdên di sala 2024’an de serî li penaberiyê dane ji Bakur in. Bi giştî 23.085 kurdên ji Bakur serî li mafê penaberiyê dan. Di rêza duyemîn de jî kurdên ji Rojava cih digirin. Hejmara kurdên Rojava ya serî li mafê penaberiyê dana 18.212 in. Her wiha 5.673 kurdên Başûr û 1.286 kurdên ji Rojhilat di sala 2024’an de li Almanyayê serî li mafên penaberiyê dan.
FAKTORÊN GIRÎNG ÊN DI NAVA ÎSTATÎSTÎKAN DE CIH NAGIRIN
Hêjayî gotinê ye ku di nava van îstatîstîkan de kesên bi rêbazên legal bi boneya gihandina hev a malbatê yan jî sedemên din têne Almanyayê cih nagirin. Ji hêla din ve ji ber statuyeke ukraîniyên ji ber şer revî ne ya taybet heye; ew jî nakevin di nava îstatîstîkên penaberiyê de.
HEJMARA GIŞTÎ YA KURDAN LI ALMANYAYÊ
Kurd ji bilî îstisnayekî di îstatîstîkên fermî de wekî netew li Almanyayê nayên tomarkirin. Heta niha hejmara mîsoger ew e ku di navbera salên 2000 û 2024’an de bi giştî 717.636 kurdan serî li mafê penaberiyê dane. Her wiha ger hejmara kurdên di salên 70’an û 80’an de wekî karker hatine Almanyayê, zarokên wan, kurdên heta sala 2000’î serî li penaberiyê dane, yên bi rêyên legal bi minasebeta gihana hev a malbatê, yên ji bo xwendinê hatine û zarokên li vî welatî çêbûne ber çavan were girtin, hejmara kurdên li vî welatî digihe derdora 3 mîlyonan.
**
Nûçeya Eleqedar:
- Nêzîkî 90 hezar kurdan li Almanyê serî li penaberiyê dan
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.