___Cemil Oguz___

Ji bo kêm kesan dibe nesîb ku di fîlmekî Hollywoodê de bilîze. Û her ku tu lîstikvanekî kurd bî, rewş zehmetir dibe. Niha lîstikvanekî kurd di fîlmekî Hollywodê de ye. Lîstikan Azîz Çapkurt ligel lîstikvana navdar Eva Green di fîlmê Hollywoodê "Dirty Angels" de dilîze.

ROLA LIGEL EVA GREEN
Fîlmê "Dirt Angels" ji aliyê derhêner Martin Campbell ve hatiye kişandin. Çîroka fîlm li Afganistanê derbas dibe. Dema DYA ji Afganistanê vedikişe komek terorîst êrîşê dibistana keçikan dikin. Ew, keça Balyozgê DYA'yê Bedîa jî têde komek keçikan dîl digirin. Koma terorîst ji bo serê her keçikê 10 mîlyon dolar fîdyeyê dixwazin û pêre jî dixwazin gitiyekî bi navê Şêx El Şîmalî bê berdan.
Di fîlmê aksiyonî de lîstikvana navdar Eva Green, Maria Bakalova, Ruby Rose dilîzin. Lîstivanê kurd Azîz Çapkurt jî di fîlmî de dilîze.

PIŞTÎ 20 SALAN HOLLYWOOD
Lîstika di fîlmên Hollywoodê de her gav ji bo lîstikvanên kurd nabe nesîb. Ji bo lîstina di fîlmekî Hollywoodê de me xwe gihand Azîz Çapkurt. Çapkurt ev nêzî 20 salan e di fîlman de dilîze. Wî derhêneriya hin fîlman jî kiriye. Li ser pirsa, "Têkiliya te bi Hollywoodê re çawa çêbû? Çawa te girtin nava vî fîlmî?" wisa dibêje, "Heft sal berê min berê xwe da Ewropayê bo ku di fîlmên enternasyonal de bixebitim. Zehmet bû, ji ber ku tu têkîlî û derfet nîn bûn. Dîsa jî min xwest biceribînim. Bi xatirê fîlmên min li Tirkiyeyê çêkiribûn ajansek li Almanyayê û dû re jî ajansek Londonê ez qebûl kirim. Min dest pê kir û li Ewropayê kariyerek nû min di sêrî de ava kir. Ev projeya Hollywoodê jî bi rêya ajansa min a Londonê hat."

'LÎSTINA LI HOLLYWOODÊ HÎSEKE ECÊB BÛ'
Li ser pirsa me ku "Hesteke çawa ye wekî kurdekî di fîlmekî Hollywoodê de dilîze?" jî Çapkurt wisa dibêje, "Bi rastî hesteke ecêb bû. Çîroka lîstikvaniya min li bodrûmeke Kadikoya Stenbolê ligel koma Teatra Evîna Welat dest pê kir. Bo vê yekê jî navbera cîhê min dest pekir û vê projeyê kontrasteke mezin hebû. Li ser setê bi lîstikvanan re jî me qala vê gelekî kir. Bo wan jî ecêb bû." Li ser pirsa "Ji bo rolê we xebatek çawa kir?" jî Azîz Çapkurt van tiştan dibêje, "Min berê jî gelek projeyên navneteweyî çêkiribûn. Di nav gelek projeyên navnetweyî de min cih girtibû. Bi wî alî ez bi xwe bawer bûm. Wekî din zehmetî tenê teşqeleya fîlma aksiyonê bû. Me çend hefteyan amadekariyeke giran kir û em fêrî taktîkên leşkerî û xebitandina çekan bûn. Lîstikvanên ji gelek welatên cuda wekî ji Amerîkayê, Îngilîstanê, Avusturalyayê, Israiîlê, Yewnanîstanê hebûn. Ez gelek tiştan jî fêr bûm. Her fîlmek dibistanek e."

'XEBAT Û DÎSÎPLÎN GIRÎNG E'
Ez ji Azîz Çapkurt dixwazim qal bike ka "Ji bo lîstikvanên me li dinyayê wisa di fîlmên girîng de bilîzin çi pêşniyarên te hene?" wisa dibêje, "Çi bêjim? Gelek tişt hene. Lîstikvanî zehmet e lê belê bo akterên kurd zehmetir e. Bo lîstikvanên ciwan kurtasî bêjim; Bila rêya wan vekirî be. Ger rê girtîbin jî divê ji xwe re rêyekê vekin. Lazim e tim hêvîdar bin. Bo yek armanc gelek rê hene. Yek nebû ya din biceribînin. Her roj li ser lîstikvaniyê xebat girîng e. Xebat û dîsîplîn talent girîngtir e. Sînemeya kurd û navneteweyî bishopînin û bielimin-ser bixebitin. Têkîlî bi sinemagerên kurdan re çêbikin. Û divê qet nebe îngilîzî û yek du zimanên biyanî bizanîbin. Da ku bikaribin têkîlî û xebat li gel sînemagerên navneteweyî ava bikin. Herî dawî jî platformên casting wekî Spotlight, Crewunited, Castforward bizanibin."

*

AZÎZ ÇAPKURT KÎ YE?
Lîstikvan Azîz Çapkurt di 1981'ê de li Qersê hatiye dinê. Di sala 2002'yan de li Stenbolê ligel Teatra Evîna Welat dest bi karê şanoyê kiriye; di hin lîstikên kurdî de rol girtiye ser milên xwe.
Çapkurt ku demek di hin fîlman de wekî asîstanê derhêner kar kiriye, di sala 2006'an de beşdarî  Mezopotamya Sînema Kolektîfî bûye. Çapkurt ligel karê lîstikvanî, derhêneriya kurtfîlmê wekî  “Bêdengî” û “Annem Bariş İstiyor” (Diya min aştiyê dixwaze) jî kiriye.
Di 51'emîn Festîvala Porteqala Zêrîn a Antalyayê de Çapkurt bi rola di fîlmê "Klama Dayika Min" (derhêner Erol Mintaş) de Xelata Lîstikvanê Duyemîn ê Herî Serketî girtiye.
Lîstikvan Azîz Çapkurt ku ji sala 2017'an ve li Almanyayê dijî, heta niha di gelek projeyên navneteweyî yên li welatên Amerika, Îngilistan, îran, Yewnanistan, Fas, Swêdê de lîstiye. 
Ligel fîlman, wî di rêzefîlmê wekî "Catherine The Great" (derhêner Jamie Payne ku xelata Emmy girtiye), rêzefîlmê Berkun Oya "Bir Başkadir" û yê Disney "Kaçış" de jî lîstiye.
Çapkurt herî dawî di fîlmê derhêner Nadia Fall ê bi navê "Brides" de lîstiye ku ev fîlm vê mehê yekem car li Festîvala Fîlman a Sundanceyê dê bê nîşandayîn.