Qamişlo

Şaredariya Gel a bajarê Amûdê ya kantona Cizîrê, civîna xwe ya nîvsalê li dar xist. Civîn li navenda Partiya Yekîtiya Demokratîk (PYD) hate lidarxistin.

'HEVKARIYA ŞAREDARIYÊ BIKIN'
Di civînê de hevserokê Şaredariya Gel a Amûdê Mihemed El Umerî diyar kir ku şaredarî tevî derfetên kêm û zehmetiyan jî her tim di nava hewldanan de ye ku kêmanî nekeve rewşa xizmetguzariyê û rewşa bajar bi tevahî baş bike.
El Umerî bang li şêniyan kir ku bi şaredariyê re hevkar bin da ku hişmendiya civakê xurttir bikin û bi hev re bi giyanê komînal bedewiya bajêr biparêzin.

HIN XEBATÊN KU KIRINE
Hevseroka Şaredariyê Raniya Yûnis jî projeyên herî girîng ên ku di nava vê salê de hatine temamkirin bi şêniyan re parve kirin: Xebatên paqijkirina kanalîzasyonê, kampanyayên paqijiyê yên giştî, vemirandina şewatan, gerên şopandinê yên zimhêrê û xebatên bajarê pîşesaziyê hin ji wan bûn 

PROJEYÊN ÎSAL WÊ PÊK BÎNIN
Rêveberê Beşa Teknîkî Luqman El Umerî ji bo, projeyên ku di plansaziya 2025’an de cih digirin got:
- Qîrkirina rêyên sereke û têketinên sereke bi lêçûna 74 hezar û 681 dolarî
- Projeya kanalîzasyonê ku dest pê kiriye bi lêçûna 32 hezar û 607 dolarî
- Bi cihkirina ragaran bi lêçûna 12 hezar û 576 dolarî lê hîna dest bi vê xebatê nebûye
- Kolandineke bîreke nû bi lêçûna 52 hezar û 26 dolarî ku çaverê ye di demeke nêz de dest pê bike
- Pêxşstina binesaziya herêma pîşesaziyê.