Diyarname
Hevserokên DEM Partiyê bi nivîskî ji TFF'ê (Federasyona Fûtbolê ya Tirkiyeyê) xwestin ku cezaya li Amedsporê hatiye birîn, bê betalkirin.
Mesele çi bû? Ji serî de em lê binêrin:
- Îsal heta hefteya 4'an sponsorê Amedsporê tune bû. Di hefteya 5'an de kompaniya Amedê ya bi navê "TEZGEL" ji bo li aliyê pêş li ser formaya tîma Amedspor reklam bê kirin ligel klûbê li hev kir. Amedsporê di hefteya 5'an de logoya TEZGEL'ê li ser formayê da. Di bin logoya TEZGEL'ê de diruşmaya kompaniyê bi kurdî ye, "Koma me ji bo we". Ev jî li ser formayên Amedsporê hat nivîsîn.
- Amedspor hefteya 5'an di maça ligel Pendiksporê de ev forma li xwe kir. Bi vê yekê di dîroka fûtbola Tirkiyeyê de cara yekê bû tîmek li ser formaya wê nivîsên kurdî û derdikeve maçeke fermî.
- Piştî maç hat lîstin bi du sê rojan raya giştî haydar bû û nûçeya vê yekê li nav çapemerî belav bû. Di nav tora civakê de bertekên erênî û neyînî çêbûn.
- Vê hefteyê, di hefteya 6'an de Amedspor li Sakaryayê bû ku li vî bajarî nijadperest zêdetir in. Piştî maçê Lijneya Dîsîplînê ya TFF'ê ceza li Amedsporê birî. Piştî maça ligel Sakaryayê bi çend xalan de ceza li Amedsporê hatiye birîn lê xala ku niha mijara raya giştî ye meseleya nivîsa kurdîbûna li ser formayê ye. Lijneya Dîsîplînê ya TFF'ê di daxuyaniya belav kiriye de negotiye "Ji ber kurd", lê wisa gotiye, "amûrên bikar anîne dijî fermanan rêgezê ne" û bi ser vê re 110 hezar TL cezayê pereyan li klûbê biriye.

HEVSEROKA BETALKIRINA CEZAYÊ XWEST
Hevserokên DEM Partiyê Tuncer Bakirhan û Tulay Hatimogullari cuda cuda li ser hesabên xwe yên tora civakî peyam belav kirin û daxwaza betalkirina cezayê kirin.
Bakirhan li ser bêtehamuliya li hemberî kurdî ya li Meclisa Tirkiyeyê de û ya li ser formaya Amedsporê aniye ziman û gotiye, "TFF gere ji vê biryara şermê bi paş ve gavê biavêje û bi awayekî fermî lêborînê bixwaze. Ev bêhurmetiya li hemberî zimanê zikmakî yê mîlyonan dijî rêgezên demokratîk û aştiya civakî ne. Êdi bes e. Em vê neheqiyê û zilmê qebûl nakin."
Hatimogullari jî ev ceza wekî êrîşa li hemberî zimanê zikmakî ya kurdan bi nav kir û got ku biryara TFF'ê helwesta bêtehamuliya li hemberî kurdî xwe nîşan dide. Hatimogullari jî xwestiye TFF bidyarê betal bike û lêborînê bixwaze.

LI EWROPAYÊ REWŞ ÇAWA YE?
Zagona TFF'ê dabêje li bin logoyê diruşma kompanî heye yan na. Tenê dibêje, "dijî rêgezan". Di zagona TFF'ê de ev ne sûc e. Li Ewropayê jî. Me li ser rewşa tîmên Ewropayê lêkolîn kir. Hin mînak bi vî rengî ne:
- Yek ji tîmên mezin a Ewropayê Arsenal e ku tîmek îngilîz e. Arsenal li ser formaya xwe reklama reyên hewayî ya Emiratesê dike û di binî de jî diruşma Emiratesê ya wekî "Fly Better" heye. Rojek ceza li Arsenalê nehatiye birîn. Heman reklam li ser formaya Real Madridê jî heye.
- Li Spanyayê Atletico Madridê ji kompaniya Azerbaycanê reklam girtibû, û di binê nivîsê de diruşma wan "Lang of fire" hebû.
 

**

Nûçeya Eleqedar:

- Amedsporê kurdî xist nav lîsteya TFF'ê jî