Diyarname
9’emîn Festîvala Belgefîlman a FîlmAmedê bi nîşandana belgefîlmê “Li Ber Siya Spîndarê” û merasîma xelatdayînê bi dawî bû. Festîval ku bi dirûşma “Reh… Li dora agir rastiyên efsûnî…” hate organîzekirin, bi hevkariya Şaredariya Peyasa Amedê û Komeleya Akademiya Sînemaya Rojhilata Navîn li dar ket. Festîval bi merasima xelatdayînê bi dawî bû. Di merasima bi dawîkirina festîvalê de dayika Kemal Kûrkût Secan Kûrkût û gelek kesan din amade bûn.
Di nav bernameya roja dawî de panel û nîşandayîna fîlman hebû. Panela bi navê “Şîn, Bîr, Têkoşîn: Di Sînemaya Belgefîlman de Şahidî û Edalet” li ÇandAmedê li dar ket. Parêzer Eren Keskîn, derhêner Veysî Altay û Berke Baş di panelê de axivîn.
Di eywanên sînemayê yên ÇandAmedê de belgefîlmên “Li Dengê Azadiyê Da”, “Xana Nû”, “Firîngî Îsot Depresyon” û “Kerboran” hatin nîşandan. Her wiha, li eywana Bezgîn Bekîr belgefîlmên “Aşkere Veşarî: Antolojiyeke (Xwe) Sansurê” û “Habîbûllah”, li eywana Şanoya Bajêr a Amedê “Meşa Îrisê”, “YÎBO” û “Xewna Rojînê”, û li Navenda Ciwanan a Rezanê jî “Fîlmeke Fedaî” û “Sirgûn Qet Naqede” hatin pêşandan.
“Ev xebat rêwîtiya heqîqetê ye” 
Hevşaredara Peyasê Bêrîvan Sîncar di merasima dawîkirina festîvalê de axivî û got: “Ev pêvajo ji Navenda Çand û Hunerê ya Cegerxwînê dest pê kir û niha berfirehtir bûye. Xebatkaran karekî hêja kirin, em bi serbilindî beşdar bûn. Eleqeya mezin me kêfxweş kir. Her fîlmek bû şahidê rastiyên me, êş û hestên me. Ev xebat ji bo rêwîtiya heqîqetê pir girîng e. Em pirsgirêkên gelê xwe weke yên xwe dibînin û em ê vê pêvajoyê bi xwedîderketin û bernameyên nû bidomînin.”
“Polîtîkayên qirêj li vir têk çûn” 
Hevşaredar Cengîz Dundar jî diyar kir ku “Ev festîval bûye mihrîcaneke navneteweyî û di çapemeniya cîhanê de cih girt" "û wisa dom kir: Em spasiyên xwe ji gelê xwe re dikin. Êşa gelê Kurd hîn teze ye. Di her belgefîlmê de me axa xwe, êşa xwe û têkoşîna xwe dît. Dixwazin em hafizaya xwe ji bîr bikin, lê gelê Kurd dibêje ‘Em axa xwe û êşa xwe ji bîr nakin.’ Polîtîkayên qirêj li vir têk çûn. Me têkoşîna Narîn, Rojîn, Apê Mûsa, Orhan Dogan û berxwedana jinan dît. Di kesayetiya Leyla Qasim de me hemû hevalên xwe dîtin. Ev têkoşîn didome û em ê bênavber bidomînin.”
Festîvalê îsal biryar da ku di gelek waran de xelatan bide. Hin xelat jî ji bo bibîranîna wan, navên kesan lê kirin. Piştî axaftinan belgefîlm hatin xelatkirin. Di dawiyê de, Koordînatorê Çandê yê Şaredariya Peyasê Omer Fîdan plaket dan endamên juriyê û sipasiya wan kir.  

Va ne Xelatên Festîvalê
- Xelata Taybet a Juriyê: “Aşkere Veşarî: Antolojiyeke (Xwe) Sansurê” / Derhêner Firat Yucel, Erhan Ors, Hakan Bozyûrt, Can Memîş, Sîbîl Çekmen, Nadîr Sonmez, Serra Akcan, Belît Sag

- Xelata Dad û Heqîqetê ya Orhan Dogan: "Kerboran” / Derhêner Berke Baş

- Xelata Azadiyê ya Leyla Qasim: “Li Dengê Azadiyê Da” / Derhêner: Zeynep Entezar

- Xelata Baxçeyên Hevselê ya Ekolojiyê: “Habîbûllah” / Derhêner: Adnan Zandî

- Xelata Gel a Kemal Kûrkût: Ji ber rewşa tenduristiyê ya nivîskar Îsmaîl Beşîkçî piştî nîşandana belgefîlmê “Îsmaîlê Me”, dengdan nehat kirin. Juriyê biryar da ku xelatê bidin rojnameger Abdûrrahman Gok, ku kuştina Kemal Kûrkût bi wêneyên xwe eşkere kiribû. Xelat ji aliyê dayika Kemal Kûrkût, Secan Kûrkût ve hate dayîn. Secan Kûrkût di axaftina xwe de xwest kujerên lawê wê bên cezakirin û got: “Em ê tim bi koka xwe û bîra xwe bijîn!”

- Xelata Taybet a Komeleya Akademiya Sînemayê ya Rojhilata Navîn: Ji nivîskar Îsmaîl Beşîkçî re hate dayîn, ku xelat ji aliyê Serokê Komeleyê Sîpan Dagdevîren ve hate pêşkêşkirin.

Xelatên Fona Fîlman a FîlmAmedê
- Xelata Hilberînê: Dîlan Engînê bi projeya xwe “ Dengê pûş ê di hundirên min de (İçimde Kurumuş Ot Sesi)” girt
- Xelata Post-Produksiyonê: Ahmet Pertek bi projeya xwe  “Ben û Sen” girt.
- Xelata Piştgiriya Alavên Teknîkî: Fatma Çelîk bi projeya xwe “Gundem” girt.