Amed

Yek ji komên efsanewî yên muzîka kurdî Koma Amed, piştî 30 salan careke din li ser axa welatê xwe, li Amedê wê derkeve ser dikê. Ji bo konsera ku wê di 25'ê mehê li Parka Newrozê pêk were, Şaredariya Bajarê Mezin a Amedê û Şaredariya Peyasê mazûvaniyê dikin. Hevşaredaran banga beşdariya konserê kir.

Ji bo konsera Koma Amedê li Navenda Kongreyê ya ÇandAmedê civîneke çapemeniyê hat lidarxistin. Hevşaredarê Şaredariya Bajarê Mezin a Amedê Dogan Hatun, Hevşaredarên Şaredariya Peyasê Bêrîvan Guneş Sîncar û Cengîz Dundar, Cîgirê Hevşaredarên Peyasê Yilmaz Guneş û Perwerdekara Ma Musicê Sarya Ertaş beşdarî civînê bûn.

Hevşaredaran banga beşdariya konserê kir

Hevşaredara Şaredariya Peyasê Bêrîvan Guneş Sîncar behsa girîngiya konserê kir û got: “Ji salên 90’î û vir ve Koma Amedê êş û şahiya gelê kurd gihandiye gel. Ji ber vê ev konsereke girîng e. Dayina vê konserê piştî 30 salan, li Parka Newrozê girîngiyeke xwe ya manewî a mezin heye. Konser dê tevkariyê li pêvajoyê jî bike.” Sîncar bang li gelê bajêr kir ku bi xurtî beşdarî konsera ku li dar dikeve bibin. Piştre Hevşaredarê Peyasê Cengîz Dundar jî teqez kir ku konsera Koma Amed ji bîra gelê kurd diaxive û welatiyan vexwend vê konsera watedar.

“Em ê aştî û azadiyê pêk bînin”

Hevşaredarê Şaredariya Bajarê Mezin a Amedê Dogan Hatun jî bang li hemû gelê bajêr kir û got: “Banga me ji gelê me re ev e: Di salên 90’î de Koma Amed çawa bû dengê me, em jî wiha bibin dengê wan û ber bi qada Newrozê ve biherikin. Ji bo azadiya gelê kurd em ê li qadê bin û dengê xwe bilind bikin. Di 25’ê kewçêrê/cotmehê de li qada Newrozê em ê aştî û azadiyê biqîrin.” Hatun her wiha diyar kir ku ew ne tenê ji Amedê, ji hemû bajaran li benda gel in ku ber bi qadê ve biherike.

“Koma Amed dengê kevneşopiya berxwedana çandî û hunerî ye”

Di civîna çapemeniyê de Sarya Ertaş jî axavî û bal kişand ser girîngiya Koma Amed ku di çand û bîra civakî ya kurdî de çawa cih digire. Ertaş diyar kir ku kom di salên 90’î de mohra xwe li bîra çandî, hunerî û civakî xistiye û got: “Koma Amed bi muzîka xwe ya orîjînal bîra berxwedanê ya nifşekê ava kir û piştî 30 salan careke din li ser axa xwe ya jidayikbûnê bi hezkiriyên xwe re tê gel hev.”

Ertaş destnîşan kir ku konser ne tenê çalakiyeke muzîkê ye û wiha domand: “Konsera ku wê li Parka Newrozê bê lidarxistin, dê bibe dengê kevneşopiya berxwedana çandî û hunerî, hêviya aştiya civakî û baweriya bi paşerojeke demokratîk.” Her wiha Aktaş bibîr xist ku Koma Amed di serdema hebûna xwe de tevî zordestî, sirgun û qedexeyan bi muzîka xwe ziman, çand û nasnameya kurdî zindî hiştiye û got, ev hevdîtin wê 30 salên bêrîkirinê bi dawî bike û têkiliyan ji nû ve xurt bike.

Ertaş, ji ber alîkariya rêveberên herêmî spasî û kêfxweşiya xwe anî ziman ku bi îdeala “jîyana pireng, wekhev û azad” a ku di muzîka Koma Amed de cih digire diparêzin û banga beşdariyê li gel kir. Aktaş wiha dawî li axaftina xwe anî: “Em baweriyê bi hêza yekgirtinê ya çand û hunerê tînin; li hember cudakarî û pevçûnê, em ê bibin parêzvanên çanda jiyana adilane, wekhev û hevpar. Em hemû gelê ku dilsozê aştî û demokrasiyê ne, rêxistinên civaka sivîl, hunerwer û xebatkarên çapemeniyê vedixwînin ku bibin şahidê vê konsera dîrokî."

Konsera Koma Amed 25'ê mehê li Parka Newrozê ya Amedê ye û bê pere ye.