Diyarname
Weşanên Şilêr di 10 mehên îsal de 70 (50 bi kurdî û 20 bi erebî) pirtûk gihandin ber destê xwendevanan. 64 pirtûk li Rojava û 6 pirtûk li Şamê ji aliyê Çapxaneya Mezopotamya ve hatine çapkirin. 7 pirtûk jî ji bo çapê şandine Îranê lê hê negihaştine herêmê.

Li gor nûçeya ANHA'yê 70 pirtûkên ku hatine çapkirin dê cara yekemîn di Pêşangeha Pirtûkan a Şehîd Herekol a 9’emîn de bigihêjin ber destê xwendevanan. Pêşengeha Pirtûkan a Şehîd Herekol îsal di 20-26’ê vê mehê li bajarê Qamişloyê li dar dikeve.

PIRTÛKÊN BIR KURDÎ

Di nav pirtûkên hatine çapkirin de hemû pirtûkên nivîskarê Diyarnameyê Helîm Yûsiv jî hene. Pirtûkên Yûsiv berê li Bakur derketibûn, niha hemû xwe gihandin Rojava.

Pirtûkên bi kurdî yên ku Şilêrê derxistine ev in:
* Keçek ji Ronahiyê, Dengvedana Êşan, 72 Demjimêrên ji Dojehê - Merwan Berekat

* Hêlîna Şoreşê - Ridwan Nesrî

* Mêrê Avis, Mirî Ranazin, Memê BêZîn, Tirsa Bêdiran, Auslander Beg, 99 Morîkên Belavbûyî, Komara Dînan, Jinên Qatên Bilind, Sobarto, Wehşê di Hundirê Min de, Firîna bi Baskên Şikestî, Serdema Qazîmazî, Romana Kurdî, Gava ku Masî Tî Dibin, Neviyê Tozê - Helîm Yûsiv

* Dîwana 7 - Ebûdê Mexso

* Hêviya Nazê, Kerê Serkeftî, Kofiya Rovî, Roviyê Çavbirçî, Serhişko - Alan Ebdulla, Pencereya Pêşîn ku nivîskar Roja Mihemed, Dilîn Ebdulrehan, Nesrîn Yûnis û Ciwana Hisên bi hev re nivîsiye.

* Parçe Muzîk 1-2, Rîtmên Rojhilatî - Elî Seîd,

* Stêrka Şivanan - Siyamed Birîm

* Xweristin di Folklora Kurdî de - Ebas Îsmaîl

* Ew Ewrê Rawestiyayî - Beyan Selman

* Lekeya Tirsê - Evîn Teyfûr

* Berhemên Giştî - Mamoste Pîr

* Dîwana Mela Zîlanî, Mîrekî Hezarfen, Di Dîrokê de Têkiliyên Kurd û Rûsan - Sedat Uluguna,

* Hêviyên Dil - Ciwan Evdal

* Hawar - Şoreş Reşî

* Hiş: Avaniyeke Îstisnayî ye - Sîesta Mîlano

* Berbang - Lema Elî,

* Awazên Miştenûrê - Nîvyana M. Mislim

* Hemewî - Bêrîvan Şam

* Stêrkên Stranan û Denbêjiya Kurdî - Mihemedê Pîrê

* Montserrat (werger) - Gulistan Sîdo

* Axîna Dilistan 1-2-3 - Cîger Efrîn

* Şîlana Geliyê Zîlan - Ronak Mûrad

PIRTÛKÊN BI EREBÎ

* “Komara Tûtiyan” anku “مملكة الببغاوات” - Şêrzad Hesen.

* “Amara 1”, “Amara 2” û “Amara 3” anku “امارا 1”, “امارا 2”, “امارا 3” - Mihemed Seîd Ewclo

* “Trêna Efrînê” anku “قطار عفرين”, - Beraa Hisên

* “Bingeha nivîsa Helbestên Şêrko Bêkes” - “البناء السردي في شعر شيركو بيكس” - Dr. Fadil Ebûd El Temîmî.

* “Çiyayên Kurdan-Lêkolîneke Erdnîgarî ya Giştî” anku “جبال الكرد-دراسة جغرافية شاملة” - Dr. Mihemed Ebdo Elî

* “Bajarên jihevketî” anku “المدن الهشة” - Ehmed El-Omer.

* “Çiya û Çek” anku “الجبال والسلاح”- Ewildîrêj Cîmis.

* “Dema “ anku “حين تتساقط التراتيل من داركسور” - Umran Elî (Dost).

* “Roza” anku “روزا” - Selahedîn Muslim.

* “Mirovkirin Wek Penagehek Helbestî” anku “الأنسنة ملاذا شعريا” - Dr. Besam El-Mejdel.

* “Girêdan û Yekîneyên Piştgirîyê di Rêzimana Hevokan a Kurdî de” anku “الرابطة ووحدات الإسناد في نحو الجملة الكردية” - Berzo Mehmûd

* “Şoreşger Cizîrê” anku “ثوار الجزيرة” - Ronak Murad.

* “Mijarên di jiyana ziman de” anku “مواضيع في حياة اللغة” - Merwan Berekat.

* “Karta Vegerê” anku “تذكرة عودة” - Ciwan Silo.

* “Heta Mirinê Min ji Wan Hez Kir” anku “أحببتهم حتى الموت” - Diyaa Iskender.

* “Kurd di Ansîklopediya Berawirdî ya Helebê de - ji hêla El-Esedî ve” anku “الكرد في موسوعة حلب المقارنة-للاسدي” - Dr. Mihemed Ebdo Elî.

* “Ferhenga Nivîskarên Efrîn” anku “معجم كتاب عفرين” - Nîdal Yûsif.

* “Vegeriya Jiyanê” anku “استعاد أنفاسه” - Ebdulmecîd Xelef.

XEBATÊN WEŞANA ŞILÊRÊ

Weşanxaneya Şilêr (ku di 4’ê Îlona/Rezbera 2025’an navê xwe kir Weşanên Şilêr) di sala 2017’an de, ji aliyê Komîteya Wêje ya Bakur û Rojhilatê Sûriyê ve, li bajarê Qamişloyê yê kantona Cizîrê hat vekirin. Ji 2017’an heta 2025’an, 930 pirtûkên bi zimanên kurdî û erebî derxistine.

Weşanxaneya Şilêr di sala 2025’an de beşên werger, zarok, kafe û pirtûkxane jî vekirin. Ji ber wê sedemê di 4’ê Îlona/rezbera 2025’an îlan kir ku nav û logoya xwe guherandiye. Navê wê bû Weşanên Şilêr.

Weşanxaneya Şilêr bi çend pirtûkxane û weşanxaneyên li Başûrê Kurdistanê re jî kar dike. Li Dihokê bi Weşanxane û Pirtûkxaneya Xanî re, li Hewlêrê bi Pirtûkxane û Weşanxaneya Mem û Zîn, Pirtûkxaneya Rosa re, li Silêmaniyê jî bi Pirtûkxane û Weşanxaneya Cemal Erfan (Silêmanî) re kar dike.

Rêveberê Pirtûkxaneya Şilêr Cîger Efrîn di merasîma vekirina Şilêr Cafê Pirtûkxane (4’ê Îlona 2025’an) de, li ser armanca avabûna Weşanên Şilêr wiha gotibû: “Li vir şoreşek pêk hat, lê wêjeya wê tune ye, îro em dixwazin wêjeya şoreşê ava bikin.”

Dîwana Wêjeyê ya Bakur û Rojhillatê Sûriyê di 4’ê Îlona 2025’an de li Navenda Wêjeyê bajarê Qamiloyê, Şilêr Cafê Pirtûkxane vekir.

Li pirtûkxaneyê beşên Zarok, Soranî, Roman, Çîrok, Îngilîzî, Almanî, Tirkî, Folklor, Dîrok, Lêkolîn, Helbest û Pexşan, Jînenîgarî, Ziman, Wêje, Ferheng, Şano, Ziman û Ferheng – Erebî, Jin û Zarok, Zanist, Erdnîgarî, Tendirûstî û Bijîşkî, Ol, Lêkolînên Wêjeyî, Qanûn, Mûzîk, Huner, Felsefe, Derûnî, Lêkolînên Sosyalîzmê, Lêkolînên Siyasî, Cins, Polîtîka, Civaknasî, Lêkolînên Giştî hene. Di heman demê de pirtûkên Abdullah Ocalan jî di refên pirtûkxaneyê de cih digirin. Bi giştî 7 hezar û 930 pirtûk, ji wana 765 pirtûk bi zaravayên kurdî, 70 bi zimanên biyanî, 7 hezar û 95 pirtûk jî bi zimanê erebî tê de cih digirin. Ji wana 860 pirtûkên bi zimanên kurdî, erebî, tirkî berhemên Çapxaneya Şilêr in. Piştî 70 pirtûkên 2025’an li Pêşangeha Herekol a Pirtûkan a Navdewletî hatin pêşandan, dê ew jî cihê xwe di pirtûkxaneyên Şilêrê de bigirin.

Li gorî agahiyên ku rêvebera Weşanên Şilêr Fîdan Mihemed dane, niha ew amadehî dikin li Parka Azadî ya Qamişloyê pirtûkxaneyeke din jî vekin. Fîdan diyar kir ku yek ji armancên wan ew e ku li bajarên din ên Bakur û Rojhilatê Sûriyê (Amûdê, Dêrik, Hesekê, Reqa, Tebqa û Kobanê) jî pirtûkxaneyan vekin.