Diyarname
Duh li Somayê maça Somaspor û Bursasporê hebû. Temaşevanên Bursasporê çêrê siyasetmedar Leyla Zana kirin. Serokê Klûba Amedsporê û Serokê Baroya Amedê bertek nişan dan.

Temaşevanên Bursporê li dijî kurdan, tîmên kurdan, şexsiyetên kurdan her nijadperestî tevgeriya ne. Niha jî di maçê de çêrê siyasetmedar Leyla Zana kirin.

EREN: EZ BANG LI RAYEDARAN DIKIM TEVDÎRÊ BIGIRIN
Li ser vê yekê Serokê Klûba Amedsporê Nahit Eren daxuyanî da û got, "Em dizanin çêrên li hemberî Leyla Zana bi çi armancî hatine kirin. Zimanê nefret û cudakariyê demen dawî de bi zanebûn tînin stadan. Tiştê tê jiyîn ji rojeva welat ne serbixwe ye. Ligel ku berê me bal kişandibû ser vê talûkeyê jî mixabin tevdîr nehatin girtin. Em carek din rayedaran li hemberî vê talûkeyê hişyar dikin û bang dikin ku tevdîrê bgirin. Ez vê êrîşa xirab ku hedef çanda jiyana bi hev re ye şermezar dikin."

GULEÇ: EMÊ DOZÊ VEKIN
Serokê Baroya Amedê Abdulkadir Guleç jî ser hesabê xwe re bertev nişan da û got, "Çêr û tehdîdên li hemberî sembola siyaset, têkoşîna jinan û gelê kurd Leyla Zana bi awayekî eşker sûca nefretê ye ku derketiy holê. Em wekî Baroya Amedê em radigihînin ku der barê ev kesên wisa kirine de ji bo doz bê vekirin emê serîlêdana xwe bikin."

TJA: EV NEFRETA DIJÎ JINA AZAD E
Tevgera Jinên Azad (TJA) li hemberî vê kirinê daxuyaniya nivîskî belav kir. TJA'yê got, "Em dizanin ev êrîşa li hemberî Leyla Zana li hemberî Têkoşîna Jina azad e. Rola ku jina kurd di siyasete de, hemû qadê jiyanê û têkoşîna aştiyê de girtiye ser milên xwe tirsa herî mezin a zihniyeta faşist e. Loma jî bi vê ne tenê jineke siyasetmedar hedef girtine, têkoşîna azad a jinê kirine hedef. Li hemberî nijadperestî, faşizm û nefreta birêxistinkirî emê têkoşîna xwe bi biryar bidomînin."

'LEYLA ZANA NE BI TENÊ YE'
Platforma Piştgirî û Parastina Bajêr a Amedê jî daxuyaniya nivîskî belav kir û got ku Leyla Zana ne bi tenê ye, pêşeroja vî welatî ne di sembolêntarî de, di wekhev û têkoşîna azadiyê de ye.