ENQERE
Mebûsanê DEM Partî  Salîha Aydenîz (Mêrdîn), Ayten Kordu (Dêrsim), Adalet Kaya (Amed), Cengîz Çîçek (Îstanbul) û Omer Faruk Hulaku (Çewlîg) goreyê madeyê 98'inan ê Qanûnê Esasî seba pawitişê kirmanckî (zazakî) ke binê talûkeyê vindîbîyayîşî de ya, Cigêrayîşê Meclîsî arz û teklîf kerd.

Wekîlan ard ziwan ke kirmanckî ke ziwananê tewr qedîmanê cografya Anatolya û Mezopotamya ra yew a, hetê mîlyonan hemwelatiyan ra yena qiseykerdene la netîceya texrîbatan de ke modernbîyayîş, şaristanbîyayîş û qedexeyanê ke bi seran dewam kerd, ewro hemverê prosesê vindîbîyayîşî de ya ke telafîyê ay zehmet o.

Wekîlan ard vîrî ke UNESCO Atlasê Ziwananê Binê Talûkeyî de kirmanckî kategorîya “bêasayîş” de bi ca kerda û rapor kerdo ke eke leze tedbîr nêgîrîyo ziwan do vindî bibo. 
Wekîlan vat ke vîyartişo xozayî ke dadî-babî ra vîyareno domanan, ameyo noqtaya vinderdişî û ziwan tena mîyanê neslanê pîlan de qisey beno.

Wekîlan teklîfê xo de waşt ke enî xalan sero bêro lêkolînkerdişî:
- Bi datayanê rojaneyan rêjeyê qiseykerdişî û vilabîyayîşê herême yê kirmanckî bêro tesbîtkerdene

- Astengê vernîya perwerdeyê ziwanê dayike bêrê cigêrayene
- Raştkerdişê qanûnî yê ke seba teşwîqê şuxulnayîşê warê pêroyî lazim ê

înan van te gere bi zanayîşanê însîyatîfanê sîvîlan û akademîyî “Planêka Çalakîye ya Lezabeze” bêro amadekerdene.