Diyarname
Seydayê kurd, yek ji avakarên Enstîtuya Kurdî ya Stenbolê Abdurrehman Durre li Kolna Almanyayê wefat kir. Cenazeya Durre dê li Milazgira Mûşê bê veşartin.

Seyda Abdurrehman Durre di sala 1930'yî de li Milazgira Mûşê hatiye dinê. Wî 15 salan di medreseyên kurdî de xwendiye û paşê miftîtî kiriye. Di navbera salên 1962-1975'an de miftîtî kiriye. Seyda ku bi zimanê kurdî, tirkî, edebî û farisî dizanî demekê li Libyayê mutercimiya erebî û tirkî kiriye. Deh berhemên wî yên bi kurdî,erebî, farisî û tirkî ku yên çapkirî û yên ne çapkirî hene, hin ji berhemên wî jî ev in: “Şerha Dîwana Ehmedê Xanî, Felsefe û Jiyana Wî”, "Kurdname", "Evîna Welat".

Seyda Abdurrahman Dure ku roja 12'yê mehê li Kolnê wefat kir dê cenazeya wî bibin Milazgîra Mûşê û defin bikin.

BDP'ê peyama sersaxî weşand

Piştî wefata Abdurrahman Durre, BDP'ê peyameke nivîskî weşand got ku ji ber bihîstina xebera wefata Durre ew xemgîn in û wisa got: "Abdurrahman Durre di hemû jiyana xwe de ji bo azadiya kurdan têkoşîn da û ji ber vê yekê gelek salên temenê xwe di sirgûniyê de derbas kir. Em ji bo mirovê hurmetdar Seyda Abdurrahman Durre yê ku dê cihê wî neyê dagirtin ji Xwedê rehmê, ji bo malbat û dostên wî jî sersaxiyê dixwazin."