Amed
Pinpinîka Sultanê ku bi navê “Şahbanûya Afrîkayê” (African Queen) jî tê naskirin û berê tenê li hin deverên taybet dihat dîtin, îsal li seranserê Baxçeyên Hevselê û newala Çemê Dîcleyê li her derê derdikeve pêş.

Wênekêş Mehmet Masum Suer, li Baxçeyên Hevselê wêneyekî Pinpinîka Sultanê kişand ku piştî hewaya hênik û baranê, di bin tîrêjên rojê de baskên xwe bi temamî vekiribû û xwe germ dikir.

Pinpinîk ji bo ku karibin bifirin û tev bigerin, pêdiviya wan bi germahiya rojê heye. Ji bo ku laşê xwe germ bikin, ew baskên xwe bi temamî vedikin û demekê vekirî dihêlin. Pispor diyar dikin ku ji bo pinpinîk bikaribe bifire, nektarê kom bike û hevjînekî bibîne, divê germahiya sînga wê bigihîje nêzîkî 30 û 40 pîleyan.

Pisporên pinpinîkan derbarê vê rewşê de van agahiyan didin:

“Di serê sibê de an jî di hewaya hênik de, ew ji bo komkirina germê baskên xwe bi berfirehî vedikin û hema hema mîna panelên rojê tevdigerin. Ev germahiya ku li ser baskan tê komkirin, bi rêya damaran rasterast derbasî laşê pinpinîkan dibe. Bi taybetî cureyên pinpinîkên koçber, ji bo ku rêya xwe bibînin û arasteya xwe diyar bikin, pişta xwe bi rojê û goşeya tîrêjên wê girê didin.”

Pinpinîka Sultanê ji ber ku ji hewaya germ û şil hez dike, ev yek Baxçeyên Hevselê ji bo vî cureyî dike jîngeheke îdeal. Pinpinîka Sultanê xizmê wê pinpinîka navdar a li parzemînên Amerîkayê ye ku bi navên “Qral an Şahbanû” tê naskirin. Ev pinpinîk bi wê yekê navdar in ku piştî havînê cihên xwe yên zayînê li bakurê rojhilatê Amerîka û Kanadayê diterikînin û di demsala payîzê de mesafeyeke nêzîkî 5 hezar kîlometreyî difirin heta Meksîkayê.