MÊRDÎN
Alîkariyên ji bo Rojava yên ku li Qoser û Nisêbînê hatibûn komkirin bi 6 wesayîtan şandin Qamişloyê.

Alîkariyên ku ji ser Nisêbînê re dişînin Qamişloyê berdewam dikin. Heta niha nêzî 210 ton zexîre, derman, şîrê ji bo zarokan ji bo Rojava hat şandin.

Cîgirê Şaredarê Qoserê Burhan Kurhan berî alîkariyan bişînin li ber Navenda Çandê ya Mîtanniyê axivî û diyar kir ku roj roja bi Rojava re ya alîkariyê ye û wiha got: "Em jî wekî Şaredariya Qoserê û gelê Qoserê di çarçoveya kampanyayê de me 4 kamyonên alîkariyê anîn Nisêbînê. Em ji bo alîkariyan ji birayên xwe yên Rojava re bişînin li vir in. Di wesayîtan de zexîre heye. Alîkarî ji 18'ê reşemiyê heta 4'ê adarê dê berdewam bikin. Em bang li her kesî dikin ku bi gelê Rojava re di nava piştevaniyê de be."

Alîkariyên hatin komkirin ji Deriyê Sînor ê Nisêbînê re ji bo Qamîşloyê hatin şandin. Alîkariyên li baxçeyê Navenda Çandê ya Mîtanniyê hatin komkirin li kamyonan hatin barkirin û şandin Qamişloyê. Wesayît ji aliyê karmendên gumrukê ve hatin kontrolkirin. Di vegerê de jî polîsan wesayît kontrol kirin.

Endamê Meclisa Şaredarê beşdarî kampanyayê bûn

Her wila li Sûra Amedê jî di bin pêşengiya Endamên Meclisa Şaredariya Sûrê de kampanyayeke hate dest pê kirin. Şaredar Abdullah Demirtaş, Cîgerê Şaredar Aziz Kutlu û Turki Gultekin, endamê meclisê Kemal Gur û xebatkarên Şaredariya Sûrê beşdarî xebatê bûn. Wan bang li gel kir ku piştgirî bidin vê kampanyayê.