Amed
Şanoya Bajêr a Şaredariya Bajarê Mezin a Amedê (DBŞT) dê lîstika xwe ya bi navê "Xulamê Du Xwedî" ji bo piştgiriya bi Rojava re bilîze. Bilêtên lîstikê ji aliyê xwendekarên Beşa Hiqûqê ya Zanîngeha Dîcleyê ve têne firotin.

Derhênerê Hunerê yê Giştî yê DBŞTê û derhênerê şanoya Xulamê Du Xwedî Ruknettin Gun, da zanîn ku lîstim dê rojên 15'ê adarê roja înî û 16'ê adarê roja yekşemê saet: 20.00'an bê lîstin. Lîstika "Xulamê du xwedî" ji aliyê nivîskarê Îtalî Carlo Goldonî ve di sedsala 18'an de nivîsandiye.

Lîstika bi du perdeyî, behsa cîhana ku pere pir lê bi qîmet e û hemû têkilî li ser wê ava dibin dike. Li gorî wê, evîn jî bi pere tê kirîn û firotin.
Bilêtên lîstikê ji aliyê xwendekarên Fakulteya Hiqûqê a Zanîngeha Dîcleyê ve têne  firotin û her wiha bilêt li DBŞT jî têne firotin. Buhaya bilêtan 5 TL ye û pereyên ku ji van lîstikan bêne bi dest xistin dê ji bo piştgiriya kampanyaya Rojava bêne şandin.

Şaredariya Bajarê Mezin a Amedê û şaredariyên navçeyên navendî yên Amedê ji bo Rojava kampanya dabûn dest pê kirin û ev kampanya hê jî didome. Lîstikvanên DBŞT'ê jî di vê çarçoveyê de lîstika xwe pêşkêş dikin.