ENQERE

Rêberê PKK'ê Abdullah Ocalan ku bi heyeta BDP’ê re hevdîtin pêk anî, destnîşan kir ku derbasî pêngava duyemîn ya pêvajoya çareseriyê bûne û wiha got: “Ligel ku hinek hêz dixwazin pêvajoyê asteng bikin jî ez bi biryarim pêvajoyê pêşve bibim. Ji bo pêşveçûna pêngava duyemîn me pêşniyarên xwe peşkêşî dewletê kirine. Ez hêvîdarim dewlet nirxandineke rast bike.”

Heyeta BDP'ê ku ji Hevserokê BDP'ê Selahattin Demirtaş û Wekîla Serokê Koma BDP'ê Pervîn Buldan wekî 7'emîn heyet duh çûbûn bi Ocalan re hevdîtin pêk anîbûn.

Heyetê piştî vegerê tu daxiyanî neda, tenê diyar kir ku dê sibê (yanê îro) bi awayekî nivîskî daxuyanî bidin.

Navenda Giştî ya BDP’ê îro li ser hevdîtina Ocalan û Heyeta BDP’ê daxuyaniyeke nivîskî weşand.

Li gor daxuyaniyê Ocalan di hevdîtinê de wisa gotiye:

“Destpêkê ez her kesî silav dikim û hezkirinên xwe pêşkêş dikim. Pêvajoya em tê de ne didome.

Em niha ketine pêngava duyemîn. Me pêşniyarên xwe bi awayekî nivîsî pêşkêşî dewletê kirine.

Ez bi şexsê xwe dixwazim her pêngava pêvajoyê bi awayekî zelal bê meşandin. Ez hêvîdarim dewlet di vê pêngavê de vê pêşniyara me rast binirxîne û encamên rast bi dest bixe.

Ev meseleyeke 100 salan e. Hincetên dîrokî û aborî yên meseleyê hene. Divê her kes cidî nêzî vê bibe.

Pêşniyarên me kirine, encama xebateke ku berjewendiya ji sedî 90’ê gelên Tirkiyeyê temsîl dike ye.

Ligel astengkirina hin hêzan ez bi biryarim ku pêvajoyê pêşve bibim. Em bawerim em dê bi ser bikevin. Ger derfetên min hebûna, min dê her hefte raya giştî agahdar bikira.

Nîqaşên pêngava duyemîn êdî dest pê kirine. Her kesê li alîgirê aştiyê divê xwe tevlî van nîqaşan bike. Di vê çarçoveyê de ez careke din silavan li her kesî dikim.”