PERWER YAŞ - VERVÎERS

Di 19'emîn kongreya xwe de KON-KURD'ê biryar girt ku navê xwe bike "Kongreya Civaka Demokratîk a Kurdên li Ewropayê" (KCD-Ewropa). KCD-Ewropa ne tenê ji bo federasyonên komeleyan, di heman demê de wê bibe nûnerê saziyên jin, ciwan, çand û hunerê.

19'emîn Kongreya Konfederasyona Federasyona Komeleyên Kurd li Ewropayê (KON-KURD) li bajarê Belçîka Vervîersê îro danê sibê dest pê kir. Ji 12 federasyonan 175 şande beşdarî kongreyê bûn û ji nû ve avabûna KON-KURD'ê hat nirxandin.

Di kongreyê de ji Almanyayê YEK-KOM, ji Fransayê FEYKA-Kurdistan, ji Holandayê FED-KOM, ji Swîsreyê FEKAR Kurdistan, ji Danîmarkayê FEY-KURD, ji Swêdê Konseya Kurd, ji Belçîkayê FEK-BEL, ji Awûstûryayê FEY-KOM û ji gelek federasyonên komeleyan ên ser bi KON-KURD'ê nêzî 300 delege, xebatên salekê yên KON-KURD'ê nirxandin.

NAVENDÊN CIVAKA DEMOKRATîK A KURD WÊ AVA BIBIN

Li dû nirxandinan pêşnûmeya li ser bername û rêziknameya nû ya KON-KURD'ê bi yek dengî hat qebûlkirin. Li gorî vê yekê, navê KON-KURD'ê bû Kongreya Civaka Demokratîk a Kurdên li Ewropayê (KCD-Ewropa). Hat destnîşankirin ku ev model wê bibe rêxistinbûneke sîwan ji bo hemû tevgerên kurd ên li Ewropayê û temsîkariya KCD-Ewropa bi vî rengî hat ravekirin:

"Ne tenê rêxistina sîwanî ya federasyonên komeleyan, KCD-Ewropa wê bibe nûnerê hemû saziyên jin, ciwan, çand-huner, spor, aborî, pişeyî, bawerî, perwerde, ziman-dîrok, yekîtî, federasyon, însiyatîf û konfederasyonên kurdan ên li gelemperiya Ewropayê. Li her welatî wê Navendên Civaka Demokratîk ên Kurd bên avakirin û li ser vê bingehê ji nû ve bên rêk û pêkkirin. Bi heman rengî, meclis, komele, weqif, yekîtî û însiyatîfên li her welatî, wê xwe li gorî qanûnên wî welatî wekî navendên ser bi civaka demokratîk a kurd bi nav û rêxistin bikin."

NAVENDA WÊ DÊ LI BRUKSELÊ BE

Rêziknameya Kongreya Civaka Demokratîk a Kurdên li Ewropayê jî bi yek dengî hat pejirandin. KCD-Ewropa wê navenda wê li Brukselê be û nasnameya wê ya sazîbûnê li gorî qanûnên Belçîkayê were destnîşankirin û hewl dide bibe rêxistineke civakÎ ya demokratîk. Di rêziknameya KCD-Ewropayê de bi tu awayî cihêkariya bawerî, netewî û etnîkî nayê kirin û ev made balê dikişînin:

"KCD-Ewropa wê ji bo parastin û pêşvebirina nirxên felsefî, bawerî û nasnameya çandî ya gelê kurd bixebite. Danezana Gerdûnî ya Mafên Mirovan a Neteweyên Yekbûyî, Danezanên din ên Mafên Mirovan ên Navnetewî, pîvanên gerdûnî yên hiqûqê, azadî û mafên mirovan nas dike û di her şert û mercî de van pîvanan diparêze. KCD-Ewropa saziyeke bi pîvanên hiqûqê, demokratîk, azadîperest û pirrengiyê dilsoz e. Bi awayekî nivîskî û devkî qebûl dike, ku ewê li gel hemû mafan bi taybetî mafên jin, zarok, penaber û koçberan bişopîne û biparêze. Di serî de nijad, zayend û baweriyê, her şêweyê cihêkariyê mehkûm dike.

KCD-Ewropa, ji bo parastin û pêşvebirina mafên çandî, siyasî û civakî yên civaka kurd li Ewropayê, wê li ser bingeha danezanên gerdûnî yên mafên mirovan, qanûnên netewî û navnetewî, hikum û qanûnên demokratîk bixebite. KCD-Ewropa wê berjewendiyên siyasî, civakî û çandî yê kurdên li Ewropayê li dijî hemû sazî û qanûnan biparêze, saziyên bi vê armancê ava bike û saziyên heyî jî xurt bike.

KCD-Ewropa, di serî de zarok û ciwanên kurd ên li Ewropayê ji hemû kurdên li vê qadê dijîn di haya nasname û hebûna xwe de bin û bi nêrînên demokratîk û hemdem mezin bibin, wê têkeve nava hewldanan.

KCD-Ewropa wê ji bo dîrok û zimanê kurdî lêkolînan bike, di vê mijarê de ji bo gelê kurd û raya giştî ya demokratîk çalakiyên mîna semîner, konferans, kurs û hwd. ên hîndekar lidar bixe."

Ji bo endametiya KCD-Ewropayê jî ev xalên di rêziknameyê de bal kişandin: "Hemû federasyon, sazî, yekîtî, weqf, qulûb, navendên civakî, navendên îbadetê û komeleyên kurdistanî yên li Ewropayê ava bûne û ji aliyê meqamên fermî ve hatine erêkirin, dikarin bi awayekî nivîskî serlêdanê bikin û bibin endam."

Kongre, wê bi erêkirina pêşnûmeya plansaziya sala nû, bi dawî bibe.

ANF 

**

Têbiniya Diyarnameyê: Li Bakur jî Kongreya Civaka Demokratîk heye û piraniya sazî û rêxistininên vê derê di bin banê xwe de dihebîne.