QAMIŞLO

Endama Desteya Bilind a Kurd Îlham Ehmed, bal kişand ku rêveberiya dê li rojavayê Kurdistanê bê avakirin wekî hikumet an jî dewlet nabe û veqetîna ji Suriyê hedef nagire. 

Ehmed, destnîşan kir ku şeklê rêveberiyê wê ji aliyê hemû pêkhateyên herêmê ve bê diyarkirin û encama ku wê derkeve holê jî wê li ser esasê çareseriya pirsgirêkan û yekîtiya gelan be, her wiha dê bibe mînaka çareseriya pirsgirêka Suriyê.

Endama Desteya Bilind a Kurd Îlham Ehmed, derbarê nûçeya ku ANHA’yê çend roj beriya niha derbarê rêveberiya demî ya Rojavayê Kurdistanê de weşandibû û li herêmê dengekî mezin veda de, agahî dan ajansa me. Îlham Ehmed got ku li ser rêveberiya herêmê nîqaş û lêkolîn têne meşandin û li ser sedem û pêwîstiya vê xebatê rawestiya.  

Ehmed, destnîşan kir ku şertên Rojavayê Kurdistanê rêveberiyek bi vî rengî ferz dike û wiha dom kir: “Piştî rejîm ji herêmên Rojavayê Kurdistanê hate derxistin, pêwîstî derketiye holê ku êdî hemû pêkhateyên herêmê bibin xwedî biryar û rêveberiya xwe ya nû ava bikin.”

‘Rêveberî wê hemû pêkhateyan dibin sîwaneyekê de kom bike’

Îlham Ehmed, li hemberî nûçeyên ku derbarê mijarê de di hinek saziyên çapemeniyê de hatin weşandin û îdîa dikin ev rêveberî dê bibe tehdîtek nerazîbûn nîşan da û diyar kir ku rêveberiya wê bê hilbijartin bi şiklekî ku li ser herêmên din, gelên herêmê û welatên cîran bibe tehdît nabe. Ehmed têkildarî mijarê ev tişt anîn ziman: “Ev rêveberî hem wê karibe herêma Rojava bi rê ve bibe, hem jî karibe şoreşa Suriyê bigihîne asta serkeftinê. Wê rêveberiyek demokratîk be û hemû pêkhateyên herêmê yên wekî kurd, ereb, suryanî, ermenî, asûrî, durzî, elewî di Suriyek demokratîk û pir rengî de, dibin sîwaneyekê de kom bike, her wiha li dijî êrîşan gel biparêze û pêdiviyên gelan pêşwazî bike.”

‘Divê êdî Rojava bibe xwedî statuyek’

Endama Desteya Bilind Ehmed bal kişand ku divê êdî gelê Rojava bibe xwedî statuyekê da ku karibin bi yek nêrînê tevlî hemû civînên navnetewî yên li ser çaresûna Suriyê têne lidarxistin bibin û gelên Rojava beşdarî wan civînan bikin, her wiha modela xwe ya Suriyeyek pir rengî bidin nasîn.

‘Lêkolîn têne kirin’

Ehmed derbarê nîqaşên li ser rêveberiya herêmê de jî agahî dan û wiha axivî: “Ev nîqaş hatine destpêkirin. Em hîn di nava lêkolînê de ne û li ser mijarên wekî ‘modelek çawa, şêwazek çawa, bi pêkhateyên herêmê re lihevhatinek çawa?’ nîqaşan didin meşandin. Di demeke pir kurt de jî em ê dest bi hevdîtinan bikin û bigihîjin nêrînên zelal.”

‘Şeklê rêveberiyê wê civak diyar bike’

Ehmed, li ser şeklê rêveberiya wê bê diyarkirin jî ev agahî dan: “Şeklê rêveberiya ku lêkolîn li ser tê meşandin, wekî ku niha di hinek saziyên çapemeniyê de tê nîqaşkirin, bi şêwazê hikumetek fermî yan jî dewletekê nîn e. Rêveberiyek demokratîk ku ji nava herêmê derketiye, bi hilbijartinê hatiye diyarkirin û hemû pêkhate wê rengê xwe tê de bibînin. Yanî wê rêveberiyek bê diyarkirin, lê şeklê rêveberiyê dê di encama hevdîtin û nîqaşan de diyar bibe.”

Hevpeymana civakî

Ehmed, da zanîn ku li gel xebatên rêveberiya herêmê niha xebatên amadekirina hevpeymana civakî jî têne meşandin û wiha dirêjî da axaftina xwe: “Ev xebat bi rengê pêşnûmayê ye û piştî hate temamkirin wê pêşkêşî hemû pêkhateyên herêmê, aliyên siyasî û baweriyê bê kirin. Piştre jî wê pêşkêşî raya gel bê kirin û bê erêkirin.”

‘Daxwaza veqetînê hebûya wê ji zûde çêbibûya’

Li ser nûçe û nirxandinên ku tê îdîakirin piştî diyarkirina rêveberiyê wê Rojava ji Suriyê veqete jî Ehmed, anî ziman ku ev nûçe ji rastiyê dûr in û ev tişt got: “Tişteke wekî veqetîna ji Suriyê û serbixwebûnê nîn e. Ger ku tiştekî wisa hebûya, wê ji mêj de ev yek pêk bihata û ev şert jî hene. Perçekirina axan û welatan nêzîkahiyek li dijî berjewendiyên gelan e. Em çiqasî yekîtiya civakan pêk bînin, wê hêza civakê ewqas mezintir bibe û derfetê azadiyê zêde bibin. Veqetîna ji Suriyê çarenûsa kurdan jî nayîne. Li ser vî esasî em hewl didin ku vê projeya xwe ya demokratîk û xweser bidin qebûlkirin û nasîn. Mînakên wekî vê niha li gelek welatên cîhanê yên wekî Swîsre û Belçîka jî hene. Avakirina rêveberiya herêmê jî wê li ser vî esasî be û di heman demê wê bibe rêya çarenûsa pirsgirêka Suriyê.” 

ANHA