Diyarname

Weqfa Çand û Hunerê ya Stenbolê (ÎKSV) ku gelek festîvalan li dar dixe, di nîveka yekemîn a îsal de bi giştî 210 hezar kes çûn serdana çalakiyên wan û lê temaşe kirin. Xebatên ÎKSV’ê di beşa duyem a sala 2013’yan de jî dê bidomin. Vane agahiyên li ser xebatên ÎKSV’ê yên heta dawiya tîrmehê:

Festîvala Fîlman

32’yemîn Festîvala Fîlman a Navneteweyî ya Stenbolê îsal di navbera 30’ê adarê û 14’ê avrêlê de li dar ket. Di 2 hefteyan de li 6 salonan bi giştî di 529 seansan de, ji 66 welatan 226 fîlmên 274 derhênerî hatin nîşandayîn. 4 jê dersên sînmeayê, 3 gotûbêj, 2 atoley, 9 panel dîsa di çarçoveya festîvalê de li dar ketin. Seansên fîlman bi rêja sedî 88 tije derbas bûn û di 2 hefteyan de bi giştî 140 hezar kesî li fîlman temaşe kir. Ji sînemaya dinyayê kesên wekî Costa-Gavras, Peter Weir, Mike Figgis, Carlos Reygadas, Bille August bûn mêvanên Stenbolê.

Festîvala Muzîkê

Festîvala Muzîkê ya ÎKSV’ê îsal 41’emîn car di navbera 4-29’ê pûşperê de li dar ket. Ji cîhana muzîkê kesen navdar ên wekî Vadim Repin, Maxim Vengerov, Shlomo Mintz, Mario João Pires, Khatia Buniatishvili, Magdelena Kožená, Kim Kashkashian, Sol Gabetta amade bûn. Li dor 500 hunermend di 22 konseran de derketin pêşberî hunerhezan. Çalakiyên “Ber bi konserê ve” yên sohbet ali ser muzîkê jî eleqe dîtin. Bi giştî 20 hezar kesî li çalakiyan temaşe kir

Festîvala Cazê

Festîvala Cazê îsal ket 20’emîn sala xwe. Li gelek sehneyên cuda yên li Stenbolê li dor 21 çalakî li dar ketin. Festîvala ku 2’yê tîrmehê dest pê kir, 18’ê mehê bi dawî bû. Lê di çarçoveya festîvalê de konsera dawî roja 29’ê tîrmehê li Harbiyeyê li dar ket. Hostayê muzîkê John Legend ku xwedî 9 xelatên Grammy e di vê konserê de hunera xwe pêşkêşî 4 hezar kesî kir. Bi giştî 25 hezar kes bûn mêvanên Festîvala Cazê.

Digel van festîvalan, ÎKSV’ê “Roja Cazê ya Dinyayê ku par UNESCO û Enstîtuya Cazê ya Thelonious Monk bi hev re li dar xistibû îsal li dar xist. Dîsa saziyê ji bo 20’emîn salvegera wefata avakarê xwe Dr. Nejat F. Eczacibaşi konsereke taybet li dar xist. Di konserê de Orkestraya Filarmonî ya New Yorkê di bin şefvaniya Alan Gilbert de rojên 3-4’ê gulanê derket pêşberî hezkiriyên muzîkê. Di du rojan de li dor 5 hezar kesî lê temaşe kir.

Çalakiyên payîzê

ÎKSV niha ji bo payîzê xwe amade dike. Payîzê dê hem 13’emîn Bîenalê (14 rezber-20 kewçêr)* li dar bixe, hem jî festîvala fîlman a payîzê Fîlmekîmî. Fîlmekîmî ku îsal dikeve 12’emîn sala xwe wê di navbera 28 rezber – 6 kewçêrê de li dar bikeve.