Diyarname

Malpereke kurd wisa nivîsiye: "Xelata Hrant Dink İsmail Beşikçi wergirt".

Malperê roja 16.09.2013'yan, saet 13.20 de ev nûçe weşandiye.

Nûçe ev e: "Civaknasê navdarê Tirk Ismail Beşikçi xelata rojnamevanê Ermenî Hrant Dink wergirt.

Xelata Hrant Dink her sal didin wan kesan ji tundî cûdaxwaziyê dûr bin û ji bo azadî û cîhaneke dadmendî xebatê dikin û ji bo armancan jî zimanê aştiyê bilind dikin û daxwaz ji mirovahiyê dikin ku ji bo van armancan têbikoşin û hêvî bidin mirovan. Her wiha vê xelatê didin sazî an jî kesekî li nav Tirkiyê û li derveyê Tirkiyê de be.

Beşikçi ku vê xelatê li roja ji dayikbûna Dink de wergirt got: Ji bo vê xelata 2012 Navdewletiya Hrant Dink gelek spas dikim û ev xelat ji bo bextewerî û şaniyeke mezine. Hêjayî gotinêye ku Beşikçi îsal li Hewlêrê ji aliyê Mesûd Barzanî Serokê Herêma Kurdistanê ve xelata Barzaniyê Nemir jî wergirtibû."

Lê tiştek wisa tune ye û ev nûçe bi temamî şaş e.

Rastî çi ye?

Rastî ev e:

Beşikçi di sala 2012'yan de ev xelat girtibû. Jixwe di nava nûçeyê de peyveke wisa jî heye: "Ji bo vê xelata 2012 Navdewletiya Hrant Dink gelek spas dikim..."

Mixabin edîtorên malperê wisa edîtor in (!) tiştên ku diweşînin jî nizanin çi ye...

Mixabin asta çapemeniya kurd (em qala malperan dikin) ev e. 

Ger hûn navê malperê bixwazin, bersiva me ev e: Hema wê jî hûn peyda bikin heyran...

Rastiya nûçeya Xelata Hrant Dînk a îsal (2013) jî bi vî rengî ye:

- Îsal ji Tirkiyeyê Xelata Hrant Dink dan Dayikên Şemiyê. Di warê navneteweyî de jî xelat dan Natasa Kandic ku wê di warê mafên mirovan de gelek xebat kiriye.

Li ser navên Dayikên Şemiyê Hanim Tosun, İkbal Eren û Emine Ocak ji destên Rakel Dink û Aleksander Cherkasov xelat girt.

Natasa Kandic jî xelata xwe ji destê İsmail Beşikçi û Ali Bayramoglu girt.

Di nav juriyên îsal ên Xelata Hrant Dink de Timothy Garton Ash, İsmail Beşikçi, Rakel Dink, Costa Gavras, Nilufer Gole, Aleksander Iskandaryan, Etyen Mahçupyan û Uluslararasi "Memorial" Toplulugu hebû.

Ji bo xelatdayînê êvara 15'ê mehê merasima xelatdayînê li Navenda Kongre ya Lutfi Kirdar a li Harbiyeya Stenbolê li dar ketibû.