HEWLÊR 

Şandeya  Meclîsa Gel a Rojavayê Kurdistanê (MGRK) û Tevgera Civaka Demokratîk (TEV-DEM) îro bi Serokê Herêma Federal a Kurdistanê Mesûd Barzanî re hat cem hev. Şandeya MGRK'ê û ENKS'ê dawî li roja yekem a hevdîtinên  xwe yên li Başûrê Kurdistanê anîn û dê sibe hevdîtinên xwe dewam bikin.

Di encama hevdîtina di navbera Koma Civaka Kurdistan (KCK) û Partiya Demokrata Kurdistanê (PDK) ku pêk hatibû îro şandeya Tevgera Civaka Demokratîk (TEV-DEM) û Meclisa Gel a Rojavayê Kurdistanê (MGRK) bi Serokê Herêma Fedral a Kurdistanê Mesûd Barzanî re hat cem hev. Şandeya MGRK'ê û TEV-DEM'ê ji Endamên Desteya Rêveber a TEV-DEM'ê Aldar Xelîl û Îlham Ehmed, Endamê Komîteya Têkiliyên Dîplomasî Xerîb Hiso û Hevserokên Meclisa Gel a Rojavayê Kurdistaê Ebdulselam Ehmed û Sînem Mihemed û nûnerê PYD'ê li Başûrê Kurdistanê Cefer Henan pêk dihat. Heserokê PYD'ê Salih Muslim ji ber ku di heman demê de li Paytexta Rusya Moskoyê hevdîtin pêk tanîn tevlî civînê nebû.

Şande bi Serokê Herêma Fedral a Kurdistanê Mesûd Berzanî re hate cem hev. Her wiha Şaredarê Bajrê Mezin a Amedê Osman Baydemir û Perlementera Serbixwe Leyla Zana ku li Hewlêrê bûn jî tevlî civînê bûn. Piştî saeta yekem a civînê hin nûnerên ENKS'ê li ser navê partiyên xwe tevlî civînê bûn. Hate gotin ku di hevdîtinê de mijarên wekî  helwesta Serokatiya Herêma Başrûrê Kurdistanê û Hikûmeta Herêmê ya derbarê şoreşa Rojava, girtina Deriyê Sînor ê Sêmalka, girtina sînor li pêşiya Hevserokê PYD'ê Salih Muslim, her wiha mijarên tevlîbûna kurdên Rojava bi yek şandeyê û li ser navê Desteya Bilind a Kurd (DBK) di civîna Cenevre 2 de hatin gotûbêjikirin. Her Wiha di hevdîtinê de bi awayekî berfireh projeya Xweseriya Demokratîk a Rojava hate nîqaşkirin.

Nûnerên ENKS'ê li ser navê partiyên xwe amade bûn

Hêjaye gotinê ku piştî saetek di ser hevdîtina Şandeya MGRK'ê û TEV-DEM'ê bi Barzanî re derbas bû Serokê Partiya Demokrata Kurd li Sûriyê (El-Partî) Ebdulhekîm Beşar, Serokê Partiya Azadî Mustefa Cuma, Sekreterê Yekîtî Ibrehîm Biro, Serokê Partiya Pêşverû ya kurd li Sûriyê (PDPKS) Hemîdê Hecî Derwêş û Cîgirê Sekretrê Partiya Yekîtiya Demokrata kurd li Sûriyê (Elwehdê) Mistefa Meşayîx tevlî civînê bûn. Hate gotin ku rayedarên ENKS'ê yên ku tevlî civînê bibûn diyar kirin ku ew ne li ser navê ENKS'ê tevlî civînê bûne û gotine "Em li vir nûnertiya partiyên xwe dikin."

Tê payîn ku sibe şandeya MGRK û TEV-DEM'ê civînên xwe dewam bikin.

ANHA