SOZDAR KOÇER / DÊRIK

Şandeya Rêxistina Mafên Mirovan (HRW-Human Rights Watch) û Enstîtuya Fransî ya Rojhilata Nêzîk (Institut français du Proche-Orient -IFPO)” bi şandeya Meclisa Zagonsaz û Meclisa Rêveber a Kantona Cizîrê re civiya.

Ji bo der barê rojavayê Kurdistanê û Rêveberiya Xweseriya Demokratîk de raporan amade bike, heyeta HRW û IFPO'yê duh di deriyê sînor ê Sêmalka yê di navbera Başûr û Rojavayê Kurdistanê re derbasî Rojava bûn. Şande ji aliyê hevserokên Meclisa Zagonsaz Hekem Xelo û Nezîra Goriyê, Cîgira Serokê Desteya Karên Derve Emîna Osê, endamên Desteya Karên Derve Şamîran Şemon û Fadil Mûsa û Serokê Desteya Tûrîzm û Şûnwaran Lokman Ehmê ve hatin pêşwazî kirin.

Her du heyet li Seyrangeha Paradayis a bajarê Dêrikê li hev civiyan. Di civînê de rewşa mirovî û ambargoya li ser herêmên rojavayê Kurdistanê û zehemtiyên derbasbûna alîkariyên mirovî hatin nirxandin. Hevserokê Meclisa Zagonsaz Hekem Xelo di civînê de da zanîn ku tenê alîkariyên ku rêxistin û saziyên kurdî dişînin digihîjin rojavayê Kurdistanê. Xelo got ku alîkarî di rêya deriyên sînor ên Dirbêsiyê û carnan jî yê Til Koçerê re derbas dibin û da zanîn ku pêwîst e deriyên sînor ji bo alîkariyên mirovî bêne vekirin.

Şandeya Human Rights Watch û IFPO`ê bi serokê Desteya Tûrîzim û Şûnwaran Lokman Ehmê re jî rewşa binesazî û kar û bajarên çandiniyê û awayên peydakirina pêdiviyên çandiniyê jî nirxandin.

Piştî civînê şande çû serda cihê teqîna ku roja 23`ê rêbendana derbasbûyî li bajarê Dêrikê pêk hatibû û bandora teqînê li ser avahiyên derdorê şopandin.

Tê payîn ku şandeya Human Rights Watch û IFPO`ê biçe navenda Meclisa Rêveber a Kantona Cizîrê ya li bajarê Amûdê û bi hikumeta kantonê re hevdîtinan pêk bîne. Şande her wiha dê biçe serdana saziyên civakî û xizmetê yên li herêmê, navendên Yekîneyên Parastina Gel (YPG), navendên Yekîneyên Parastina Jinê (YPJ), navendên Asayîşê, girtîgeh û cihên ku komên çete lê teqîn pêk anîne.

Şande ji bo hevdîtinên xwe dewam bike çû bajarê Qamişlo. Tê payîn ku şande piştî kantona Cizîrê biçe serdana kantona Kobanê û Efrînê jî.

ANHA