ÎBRAHÎM AÇIKYER - ENQERE 

Cîgirê Hevserokê BDP'ê yê ji Rêveberiyên Herêmê Berpirsyar Demîr Çelîk diyar kir ku mîsyona nû ya BDP'ê veguheriye rotayeke siyasî ya projeya Xweseriya Demokratîk bi perspektîfeke Kurdistanî rewa û mezin bike. Çelîk destnîşan kir ku BDP wê vê mîsyona li Tirkiyeyê jî bi HDP'ê re bike yek û ji pirsgirêkên demokratîkbûyînê re çareseriyê biafirîne.

Mîsyona BDP'ê ya di pêvajoya nû de, pêwendiya xwe ya bi HDP'ê re, Cîgirê Hevserokê BDP'ê yê ji Rêveberiyên Herêmî Berpirsyar Demîr Çelîk ji bo ANF'ê vegot.

Çelîk bibîr xist ku BDP ji kongreya xwe ya sala 2010'an û vir ve partiyeke ku siyaseta aktîf dimeşîne û got ku BDP rêveberê siyaseta herêmî û giştî bû. Çelîk da zanîn ku bi avabûna Partiya Demokratîk a Gelan (HDP) re ew gihîştin wê biryarê ku li gelemperiya Tirkiyeyê HDP'ê derxin pêş û BDP'ê jî veguherînin partiyeke li Kurdistanê xebatê dimeşîne.

'BDP WÊ BI GIRANÎ SIYASETEKE KURDISTANÎ BIMEŞÎNE'

Çelîk got ku BDP wê di 8'ê pûşperê, HDP jî roja 22'ê pûşperê kongreya xwe lidar bixin û wiha dom kir: "Pêkane al û navê partiyê were guhertin. Navê wê dê bibe Partiya Herêman a Demokratîk yan jî Partiya Gelan a Demokratîk. Wê bi giranî siyaseteke Kurdistanî bimeşîne. Bi rêya akademîsyenan wê hewl bide bibe xwedî ezmûnên siyasî û veguhere partiyeke kadroyî ya ku perwerdeya îdeolojîk û felsefî esas digire. Dê nebe partiyeke xwe dispêre hilbijartinan, wê veguhere organîzasyoneke siyasî ya rêxistinbûyîn, îdeolojî û felsefeya siyaseta demokratîk a civakê dimeşîne. Qadên ku BDP vala bike, wê piştî 22'ê pûşperê HDP dagire."

'EMÊ LI QADA HERÊMÎ PIRSGIRÊKÊN MÎNA XIZANÎ, BIRÇIBÛN, BETALIYÊ ÇARESER BIKIN'

Cîgirê Hevserokên BDP'ê yê Çelîk  bibîr xist ku wan Xweseriya Demokratîk di 14'ê tîrmeha sala 2011'an de wekî Kongreya Civaka Demokratîk (KCD) îlan kirin e û destnîşan kir ku ewê bi BDP û KCD'ê re Xweseriya Demokratîk ava bikin. Çelîk diyar kir ku bi polîtîkayên xwe yên civakî re ewê ji bo çareserkirina pirsgirêkên mîna betalî, xizanî û birçîbûnê xebatan bimeşînin û got, "Di heman demê de em dixwazin zîhniyeta otorîte û dewletê ya Kurdistanê bêmirov dihêle, xizan dike û mihtacî xwe dike bişkînin û Kurdistaneke ku di warê aborî de dikare li ser lingê xwe bisekine, biafirînin."

REALÎTEYA ÇANDÊ YA PIR NASNAMEYÎ

Çelîk bal kişand ser dînamîkên kurd, ermenî, suryanî, azerî yên li herêmê û got, "Civak xwedî realîteyeke pirçandî pirzimanî ye. Dewlet mafê wergirtina xizmetê bi pirçandî pirzimanî nade. Wan ji vê xizmetê bêpar dihêle. Em li dijî yekparêziyê derdikevin. Di vî warî de divê hem bi pirzimanî xizmet bê dayîn hem jî di ser rêveberiyên herêmî re di malên alîkariya perwerdeyê de mirov karibin bi zimanê dayikê perwerdeyê bibînin."

'XWESERIYA DEMOKRATÎK, DEMOKRATÎKBÛYÎNA TIRKIYEYÊ YE'

Çelîk her wiha girîngiya zimanê dayikê ya li qadên gelemperî û tenduristiyê destnîşan kir û anî ziman ku ewê di vî warî de bikevin nava tevgerê.

Çelîk ragihand ku hewl tê dayîn civakeke îtîraz nake, serê xwe her tim ditewîne, daxwaz nake û ya ku jê re tê dayîn têrker dibîne were afirandin û got, "Xweseriya Demokratîk di vî warî de ne tenê projeyek ji bo kurd û Kurdistanê ye. Projeya demokratîkbûyîna Tirkiyeyê ye. Ji ber vê yekê em xweseriya demokratîk di çarçoveya nasnameya etnîkî, sînorên cografî de nabînin."

MÎNAKÊN XWESERIYA DEMOKRATÎK LI CÎHANÊ

Çelîk da xuyakirin ku li hemberî Xweseriya Demokratîk di nava raya giştî ya Tirkiyeyê de paranoyayeke "em parçe bûn" hatiye afirandin û bi van mînakan proje rave kir: "Xweserî berî me, li cîhanê xwedî mînakan e. Ew civak îro li pêş in. Alman, Spanya, Îtalya, Îngilistan, Rusya, DYA. Hemûyan bi rêxistinbûyîna xweser, federatîf, konfederatîf erk, berpirsyarî radestî qadên herêmî kirin û bi vî rengî hem xwe ji mesrefeke bilind rizgar kirin hem jî ji sînerjiya dînamîkên civakî yên herêmî, di asta herî bilind de sûd wergirtin."

Çelîk diyar kir ku ewê nekevin rewşeke bendemayînan û destnîşan kir ku bi vê projeya xwe re ewê dewletê biçûk bikin û rêxistinbûyîneke ku bersivê dide pêdiviyên civakê rewa bikin. Çelîk got, "BDP wê vê bike. KCD jî wê wekî Meclisa Kurdistanî karê qanûndanînê bimeşîne."

Demîr Çelîk ragihand ku ewê di heman demê de têkoşînê bidin meşandin ku Xweseriya Demokratîk a Kurdistanê bi qanûnan, bi destûra bingehîn were ewlekirin û di vî warî de bal kişand ser girîngiya pêkhatina Şertê Rêveberiyên Herêmî yê Konseya Ewropayê. 

'HER DU LINGÊN VÊ TÊKOŞÎNÊ BDP-KCD Û HDP-HDK NE'

Çelîk anî ziman ku ewê ji aliyekî ve li ser dewletê çareseriyê ferz bikin, li aliyê din jî têkoşîna bi hêza cewherî ya civakê bimeşînin. Çelîk got, "Lingê vê yê Kurdistanî wê hebe. Bi ser BDP û KCD'ê re emê bimeşînin. Lingê wê yê din jî wê Tirkiye be. Em vîna gelan a jiyana bi hev re ya li welatê hevpar ê demokratîk destnîşan dikin. Ne rêxistinbûyîna dewletê, rêxistinbûyîna demokratîk a civakê nîşan didin. Em dixwazin vê yekê jî bi rêya HDP û HDK'ê bigihijînin gelên Tirkiyeyê."

Çelîk her wiha destnîşan kir ku pêwîst e dewlet jî ji xweseriyê re vekirî be.