SILÊMANIYÊ

Berpirsiyarê Têkliyên Dîplomasî yê Tevgera Goran Mihemed Hacî dema pêşwaziya şandeya Rêveberiya Xweseriya Demokratîk a Herêma Cizîrê ya Rojava kir got ku helwesta wan derbarê şoreşa gelê Rojavayê Kurdistanê de neteweyî û stratîjîk e û wiha got: “Em vê yekê ji bo berjewendiyên siyasî pêk naynin û em ê bêyî ku destwerdanê bikin piştgiriya Rojava bikin.”

Hacî di berdewama axaftina xwe de wiha got: “Ji bo tecrubeya Rêveberiya Xweseriya Demokratîk bi ser bikeve, em ê piştgiriyê bidinê û ji bo em nûneriya xwe li Rojava vebikin û li ser erdê piştgiriyê bidin, em di nava xebatan de ne. Siyaseta me derbarê Rojava de eşkere ye û em beşdarî tu pilanên li dijî şoreşa Rojava nebûne.”

Hacî di axaftina xwe de destnîşan kir ku eger helwesta hikumeta bê derbarê şoreşa Rojava de neyînî be, berpirsiyariyeke mezin dikeve ser milê wan û wiha axivî: “Rola me di pêşxistina têkliyên bi Rojava re gelekî girîng e. Em ê di hikumeta bê de piştgiriya gelê xwe yê Rojava ya aborî, tenduristî û dîplomasî bikin.”

Hacî di axaftina xwe de wiha got: “Em wekî Tevgera Goran piştî ku hikumeta bê bi hevkariya Yekîtî Niştimanî Kurdistan û tevgerên îslamî  bê avakirin, dê ji bo guhertina helwesta li hemberî şoreşa Rojava û Rêveberiya Xweseriya Demokratîk têbikoşin.” Hacî ji şandeya Rojava re wiha got: “Eger em bi erka xwe li hemberî Rojava ranebûn, gelê kurd dikare hesab ji me bixwaze.” 

Hacî got ku ew li dijî ambargoya li ser Rojava ne, her wiha li dijî girtina deriyên sînor û kolandina xendekan ji gelek aliyan ve û di nav de PDK’ê ne.

Li aliyê din şandeya Rojava helwesta Tevgera Goran spas kir û ji bo berdewama hevdîtinan hêviyên xwe anîn ziman. Şandeyê ji bo vekirina nûneriya Tevgera Goran li Rojava kêfxweşiya xwe anîn ziman.

Her wiha di hevdîtinê de ji aliyê Tevgera Goran tevî Dr. Mihemed Hacî endamên Meclisa Têkliyên Siyasî ya Tevgerê Riza Cebar, Zardeşt Hesen û Şanaz Mihemed û ji aliyê şandeya Rêveberiya Xweseriya Demokratîk Serokê Desteya Karên Derve Salih Gedo, Berdevkê Komîteya Karûbarên Siyasî ya Meclisa Zagonsaz a herêma Cizîrê Ebdilkerîm Umer, Nûnerê Tevgera Civaka Demokratîk li Başûrê Kurdistanê Xerîb Hiso û Nûnerê Partiya Demokratîk a Kurd – Sûriyê li Başûrê Kurdistanê Hoşeng Derwîş beşdar bûn.

ANHA