QAMIŞLO 

Rêveberê Hêzên Asayîşa Qamişlo Serbest Rêzan diyar kir ku hêzên wan li bajarê Qamişlo bi alîkariya welatiyan bêtirî 100 sindoqên hilbijartinên Serokkomariyê Sûriyê desteser kirin.

Rêzan di civîneke çapemeniyê de derbarê mijara hilbijartinên serokkomariyê Sûriyê ku 3'yê vê mehê lidar dikeve de, diyar kir ku hêzên wan li ser agahiyên welatiyan li taxên bajarê Qamişlo bi alîkariya welatiyan bêtirî 100 sindoqên hilbijartinên Serokkomariyê Sûriyê û 3 sindoqên ku şevê din hatibûn bi cih kirin, desteser kirin.

Rêzan got ku hêzên Asayîşê piştî ku Rêveberiya Xweseriya Demokratîk biryara boykotkirina hilbijartinên serokkomariya Sûriyê derxist, wan ji bo pêkanîna biryarê hemû sindoqên hilbijatinan ku bi awayekî veşartî dihatin danîn, desteserkirin.

Rêzan destnîşan kir ku her wiha şevê din wan 3 sindoqên ku bi awayekî veşartî di dibistanên taxên bajêr de hatibûn bi cih kirin, desteser kirine. Di van sindoqan de her yek ji wan 200 pelên hilbijatinê têde bûn.

Rêzan di berdewama axaftina xwe de wiha got: “Li ser agahiyên welatiyan ku diyarkiribûn sindoqên hilbijartinan di hin dibistanan de bi cih kirine, ji bilî çarkoşeya ewlekariyê ya di bin kontrola rêjîmê de ye, me dewriyên asayîşê şandin van dibistanan û hemû sindoq hatin desteserkirin. Li aliyekî din welatiyên bajarê Qamişlo derketin kolanan û diyar kirin ku ev hilbijartin ne rewa ye. Me jî ji aliyê xwe ve ji bo parastina wan dewriyên asayîşê derxistin kolanan.”

Welatiyên bajêr ji saetên sibê ve derketin kolanan ji bo ku nehêlibin li taxên wan hilbijatin bêne lidar xistin.

ANHA