Diyarname

Di vê dema ku serdema havînê dest pê kiriye de sê klasîkên ji dinyayê bi wergera kurdî li benda xwendevanên xwe ne: “Serencama Mirinekê”, “Beriya Şewatê”ku ev her du yên Gabriel Garcia Marquez in, û ya din “Çîrokên Dubliniyan” ya James Joyce ye. Her sê pirtûk jî ji aliyê Ciwanmerd Kulek ve hatine wergerandin û her sê ji Weşanên Lîsê ve hatine derxistin.

Serencama Mirinekê / Gabriel García Márquez

“Serencama Mirinekê” xelekeke girîng e ji zincîreya berhemên Gabriel García Márquez,

Wan berhemên giranbuha yên ku ji kaniya serpêhatî û çavdêriyên jiyana nivîskêr û cîhana derdora wî bi xwe dizên û bi şêwaza efsûnkar a Márquez têne hûnandin. Ev romana ku berî ku nivîskar Xelata Nobelê wergire bi salekê, derdiçe, yek ji baştirîn mînakan e ku bi azmûneyên nivîskêr ên rojnamegeriyê û şarezayiyên wî yên rind ên hûnak û aşopê bişkiviye. Serencama Mirinekê, çîroka mirinekê ye, mirineke ku ji bilî kuştiyê wê her kes pê dizane ku dê biqewime, kujerên wê her tiştî dikin da ku hin rêgiriyê bikin li vê kiryarê, lê kuştiyê wê bêhay, gav bi gav ber bi dawiya ku çarenûsê diyar kiriye, ve diçe. Ev çîroka ku Márquez bi aşopeke xurt sêwirandî, bi çavekî  hûrbijêr dîtî û pênûseke tûj û nazik nivîsandiye û qewama wê vedigere bûyereke rastî a demên xortaniya wî, li ser qewîtî û şîretên diya wî, ancax piştî ku lehengên wê ji vê dinyayê koç dikin, tê nivîsîn. Yên ku vê çîroka dilsoj, bi raz û nihêniyan meyandî, bixwînin dê bibînin ku lehengê vê çîroka, ku ne tenê li gundekî li perekî dûr ê cîhanê lê li şûnûwarên me jî encam dide, hê jî di nav me de dijîn. Kitêba ku mînaka herî kurt û bijareye ji şêwaz û nîgara yek ji mezintirîn nivîskarên cîhanê ên heta îroyîn.

Beriya Şewitî / Juan Rulfo

“Beriya Şewitî”  berhevoka hemû çîrokên Juan Rulfo ye ku ew yek ji girîngtirîn nûnerên wêjeya Meksîkayê ye. Ev berhevoka çîrokan ligel romana Rulfo ya bi navê Pedro Paramo, kuliyata berhemên wî pêk tîne. Juan Rulfo, ku nimûneyeke nadîde ye, ji ber ku bi afirandina hejmareke hindik a berheman nav û bandoreke mezin dahênaye, ne tenê ji bo wêjeya bi zimanê Spanyolî, her wiha di wêjeya cîhanê gişî de jî deng û rengekî xweser û neqane ye. Çîrokên wî ne tenê vegotinên bûyerên hatî serê lehengên wî yên hem sosret hem ji rêzê ên gundewarên Meksîkayê ne, di heman demê de strana Meksîkayê ne ku salixê didin ji bûyer û hel û mercên raborî ên ku dîrok û binhişê welatê wî pêk tînin.

Çîrokên Dubliniyan / James Joyce

“Çîrokên Dubliniyan” nimûneyên yekemîn vedihewîne ji berhemdariya James Joyce, ev nivîskar, ku yek ji nivîskarên pêş û sereke ê wêjeya modernîst e, berhemên wî heta îro jî seraqet mijara rexne, şîrove, guftûgo û analîzan in li cîhanê. Çîrokên ku Joyce ji 1904’an ve dest pê kir wan binivîse hem mînak in ji zehmetiyên ku wî di seranserê azmûneya xwe ya nivîskariyê de ligel weşanger û edîtorên wan kişandî, hem jî peyamnêr in ji bo reng, awa û naveroka berhemên wî yên di pey re, ku wekî sehayeke têkoşanê tim û tim pê gîro bû û jiyana xwe di ber de azirand. Reng û dengê van çîrokên Joyce raxistin û raberkirinek e ji hewildan û helwestên wî ên der barê ol, terîq, netew, netewperwerî, ziman û hêmayên din ên ku rastiya Îrlendayê û hiş û bîra wê ya giştî pêk tînin de. Ev berhema ku gaveke yekemîn û xurt a James Joyce di riya ku bibe nivîskarekî mezin ê cîhanî de, ligel nîşe û têbiniyên ku peywend û refaransên di metnê de hîn ron û zelaltir dikin ku ji Weşanên Lîs gihîştin ber destê xwendevanan.

- Serencama Mirinekê / Gabriel García Márquez / Roman /  96 rûpel / Berfenbar 2013

- Beriya Şewitî / Juan Rulfo / Çîrok / 147 rûpel / Berfenbar 2013

- Çîrokên Dubliniyan / James Joyce / Çîrok / 245 rûpel / Berfenbar 2013