Hewlêr
Rojnamegerên kurd daxwaznameyeke da hikumetê û xwest sedema kuştina rojnameger Soran Mame Hama bê zelalkirin.

Rojnamegerê kurd Soran Mame Hama di 21'ê vê mehê de li ber mala xwe ya li taxa Reşid Awa di encama êrîşeke çekdarî de jiyana xwe ji dest da. Niha 66 rojnamegerên kurd bi daxwaznameyeke serî li hikumetê dan û xwestin ku kuştina Mama bê şermezarkirin û rastiya bûyerê çi be bê eşkerekirin.

Di daxwaznameyê de wisa hate gotin: "Kuştina Soran Mame Hama jî nîşan dide ku azadiya çapemeniyê hê di bin tehdîdê de ye û rewşa rojnamegeran di bin xetereyê de ye. Em ji tehditên wisa natirsin û emê her rastiyê bînin ziman."

Soran Hame Mama (23 salî) ku ji bo rojnameya Leven dixebitî ji aliyê çar çekdaran ve hate kuştin û kujer bi erebeyeke bi marqeya BMW ji cihê bûyerê reviyan.
Rojnameya bi kurdî Leven ji sala 2001'ê ve du hefteyan carekê weşanê derdikeve.

Ji sala 2003'yan ve li Iraqê bi giştî 217 xebatkaran çapemeniyê hatin kuştin û ji van 13 hebên wan li Kerkûkê hatin kuştin

Ji ANF'ê hatiye girtin