Diyarname
Îsal kovarên nû dest bi weşanê dikin; niha yeka din jî li wan zêde bû: “Kewar”. Kewara ku bi hejmara xwe ya yekê dest bi weşanê kir, kovareke demsalî ye.
“Kewar” ji aliyê SOZ-DER’ê (Komeleya Lêkolînên Çand, Dîrok û Wêjeya Devkî ) ve hatiye amadekirin û derxistin. Kovar di bin banê SOZDER’ê de wê weşana xwe bidomîne. Kewar, wekî hejmara yekê Zivistan 2026 dest bi weşanê kir. Taybetiyeke vê kovarê ew e ku ev kovar û hejmarên bê wekî diyariya komeleyê dê bê belavkirin.
Kovara Kewar di warê wêjeyî, çandî, hunerî û rexneyî de nivîsan belav dike.
Di hejmara yekem de mijara sereke çand, wêjeya devkî û dîrok e. Di vê hejmarê de dosyeyeke têr û tijî hatiye amadekirin. Hemû amadekar, endamên redaksiyon û edîtor ji endamên komeleyê û nivîskarên wê pêk tên.
Xwediyê weşanê Şêxmûs Erol e û di lijneya weşanê de jî ev kes cih digirin: Gulîzar Seyhan, Şêxmûs Erol, Bîrgul Ozgul, Îsmaîl Erdem, Ahmet Çelîk, Muharrem Yasîn û Kerem Tekoglu. Her wiha Hogir Berbir, Eyup Guven, Bahattin Robar, Ahmet Çelîk û Mevlût Aykoç jî di Lijneya Redaksiyonê de ne. Lijneya Înformatîk û Teknîkî: Karên teknîkî û dîjîtal ên kovarê ji aliyê Yasemîn Demîrkaya, Berhûdan Erdem, Velî Bîngoltekîn û Mahmût Eşît ve hatine meşandin. Mîzanpaj û berg jî ji hêla Mevlûd Aykoç ve hatiye amadekirin.
Di kovara Kewarê de gelek helbest, çîrok, werger, nirxandinên li ser şêwaz, berhem û helbestvanan, nivîsên rexneyî û teorîk hatine weşandin.
Di vê hejmarê de Bahadîn Robar, Hogir Berbir, Faysal Ozdemîr, Yasemîn Demîrkaya, Ahmet Çelîk, Serdar Komurcu, Mevlûd Aykoç, Bîrgul Ozgul, Nezîr Oçek, Eyyup Guven, Ziya Şeker, Siyaroj Rebet, M. Ebdulhemîd/Remezan Mendanî, Berham Mîrzo, Dilbizarê Bêkes, Hasbeg Koksal, Dildar Botî, Zînet Dîncer, Receb Dildar, Mehmet Oncu, Herdem Mervanî, Mordem Zel, Arslan Ozdemîr, Qadir Egîd, Ahmet Tamîr, Dildar Ektîren û Kubra Ozdemîr bi nivîsên xwe ked dane kovarê.
Amadekarên kovarê li ser derxistina kovareke bi vî rengî wisa gotin, “Armanca me geşkirina ziman û wêjeya devkî ya kurdî û afirandina platformeke azad ji bo nivîskar û xwendevanan e. Kewar dê bibe cihê ku dengê çand û wêjeya kurdî bi awayekî azad û dewlemend were bihîstin.”
Hevserokê SOZ-DER’ê Eyup Guven jî wisa dibêje: “Komeleya Lêkolînên Çand, Dîrok û Wêjeya Devkî (SOZ-DER) bi xebatên xwe yên wêjeyî û rêxistinî ketiye sala xwe ya diduyan. Armanca komeleya me ev e ku roj bi roj agirê çand, dîrok û wêjeya devkî li hawirdora Kurdistanê û cîhanê gur bike û di warê çand, dîrok û wêjeyê de bi zimanê zikmakî (kurdî) berhemên nû biafirîne û belav bike.”
Xwendevan dikarin kovarê li navenda SOZ-DER û gelek cihên din peyda bê pere peyda bikin.
ÎSAL ‘BIZOT’ JÎ DERKETIBÛ
Kurtedemek berê bi navê “Bizot” kovareke din a kurdî derketibû. Bi "Kewar”ê re îsal dibe du kovarên nû ku li kovargeriya kurdî zêde dibin.