HEWLÊR

Iraqa ku di nava krîzê de ye hewl dide Serokkomarê xwe yê nû hilbijêre. Heta niha Mam Celal Talebanî bû Serokomarê Iraqê. Niha careke din ji YNK'ê dê kesekî bibe Serokomar. Ji bo vê yekê YNK'e navê du kesan Dr. Fûad Masûm û Behram Salih diyar kir. Li ser vê yekê mebûsên fraksiyona kurd a li Meclisa Iraqê (roja 23'yê mehê) li Bexdayê li hev civiyan. Di civînê ku 55 mebûs amade bûn de ji bo her duyan dengdayîn çêbû. Dr. Fûad Masûm 30 deng, Berhem Salih jî 23 deng girt û di encamê de Masûm wekî berendam nîşan dan. Her wiha du di dengdanê de du mebûs bêalî man.

Masûm hat hilbijartin

Ji bo dengdana berendamên ji bo serokomariyê roja 24'ê mehê li Meclisa Iraqê civîn li dar ket. Di dora yekem a dengdanê de berendamê kurd Dr. Fûad Masûm ji 275 mebûsan 175 deng irt. Berendamê din mebûs Henan Fetlawî 34 deng girt.
Di dora duyem da dengdanê de Dr. Masûm 211 deng girt û Serokomarê Iraqê yê nû. Dr. Masûm di dema ku dadwer Mîdhed El-Mehmûd amade bû de sond xwar û dest bi peywira serokomariyê kir.

Fûad Masûm kî ye?

Fûad Masûm di sala 1938'an de hatiye dinê, di sala 1973'an de li Qahîreyê nûneriya Mele Mistefa Barzanî û Şoreşa Kurdistanê kiriye. Di sala 1992'yan de dema li Başûr hikumet ava dibe Masûm dibe Serokwezîrê hikumetê. Ew wekî yekemîn Serokwezîrê Hikumeta Herêma Kurdistana Federal tê nasîn.

Di sala 2003'yan de dema DYA kete Iraqê û Sedam Huseyîn têk çû, li Iraqê ji nû ve meclis hate çêkirin. Di wê meclisa yekemîn de Masûm bû Serokê Meclisê. Masûm ji sala 2005'an ve wekî mebûsê Iraqê kar dike. Navbera Serokê YNK'ê Celal Talebanî û Masûm gelek baş e. Fûad Masûm bavê 5 keçan e.

Li gorî pîvana nenivîskî di Meclisa Iraqê de kursiya Serokkomariyê didin kurdan. Serokatiya Parlamentê ji erebên sunnî û wezîfeya Serokwezaretiyê jî didin şiiyan. Di Zagona Bingehîn de xaleke wisa nîn e lê mebûsên ji partiyên kurd, şiî û sunnî ji ber hevkêşeyên nav hev li gor vê pîvanê tevdigerin.