Diyarname

Li Mecidiyekoya Stenbolê di xebata çêkirina avahiyên ku aîdê Torunlar Holdingê ye de duh êvarê asarsor ji qata 32'yan filitî û bi erdê ket. Di bûyerê de 10 karkeran jiyana xwe ji dest da.

Di bûyerê de gelek şik û guman hene. Vaye li ser bûyerê hin agahî:

- Dawiya hefteyê gere xebat heta 19.00'an bihata meşandin û bi dawîkirin lê saet 19.45'an de agahî dane îtfaîyeyê ku bûyer çêbûye. (Hin agahî dibêjin bûyer saet 20.00'an de pêk ha tiye)

- Karker dibêjin asansor ne baş bû, temîrkirinên ku divê bihata kirin nehatibû kirin.

- Tê îdîakirin ku piştî bûyerê bi 3 saetan alîkariya rizgarkirina karkeran gihîştiye wir.

- Hevalên karkerên di bûyerê de mirin bûyer şermezar kirin lê polîsan êrîşê wan kir û niha bi 3 TOMA'yan polîsan ew der dorpêçkirin.

- Her çiqas xwediyê şîrketê ragihand ku tiştek wisa nîn e jî lê ev gotin li her derê belav dibe: Asansora ku li erdê ketiye berî bûyerê xira bûbû, serwîsa ku hatiye çêbike hema bi ser re lê nêriye û çûye, baş çênekiriye.

- Wezîrê Ewlehiya Kar û Xebatê yê Tirkiyeyê Faruk Çelik got: "Bi hemû aliyan ve dê bûyer bê ronîkirin. Îhmal, qisûr li ku hebe dê hesab bê pirsîn". Heta niha di hemû bûyeran de wisa hatiye gotin lê gelek bûyer piştguh hatine kirin.

- Serokwezîrê Tirkiyeyê Ahmet Davutoglu got ku hem ji aliyê îdarî hem ji aliyê edlî ve lêkolîn hatiye dest pê kirin.

- Ji bavê karkeran Mithat Kara (ku di bûyerê de du kurên wî Tahir û Ferdî Kara mirin) li ber Ali Samiyenê feryad kir: "Ligel 4 kurên xwe em dixebitîn. Du kurên min mirin." Hevalên wî ew bi zor aş kirin.

Odeya Tabîban 4 meh berê hişyar kiribû

- Odeya Tabîban a Stenbolê 4 meh berê (di 15 gulana 2014'an de) twitteke weşandibû û gotibû, "Em ji îro de hişyar dikin, mixabin sibe dê di vê avahiyê de 8-10 karkerên me bimirin."

Onder: Ev komkujî ye

- Mebûsên BDP'ê Sirri Sureyya Onder, Levent Tuzel, Erturgul Kurkçu, Seksetera Giştî ya DÎSK'ê Arzu Çerkezoglu çûn cihê bûyerê û lêkolîn kirin. Onder got: "Binêrin ger qeza ba, rojekê ji karmendan di karên van avahiyan de bimira ne? Binêrin em ji qezayên trafîkê re qeza dibêjin, têde feqîr jî, dewlemend jî dimirin. Em ji bûyerên vir re qeza dibêjin lê yên dimirin her karker in. We bihîstiye rojekê xwediyekî madenê di madenê de miriye? Rojekê ji van mitehîtan, ji zarokên wan yek di van avahiyan de miriye? Ev komkujî ye."

Onder paşê ev pirs kir: "Li ser xwîna mirovan dê kî were li vê derê rûnê? Kîjan xwînxirab dê bê li ser van tirman kêfê bike."

Hin agahiyên der barê wê derê de 

Ji bo kesên nizanin hin agahî: Li cihê ku bûyer çêbûye Stada Ali Sami Yen a Galatasaray hebû. Hikumeta AKP'ê ji bo Galatasaray Arena çêkir lê tê gotin ku beramberê wê ev der girtiye. Hatibû gotin ku ev der ligel TOKÎ, Torunlar Holding çêdike. Lê ne tenê cihê stadê, li kêleka stadê avahiya TEKEL'ê hebû ku gelek mezin bû. TEKEL ji wir bar kirin, ev cih jî bi ser cihê stadê ve kirin. Torunlar Holding li vê derê sê avahiyên mezin û bilind çêdikir. Li ev dera Mecidiyekoy her roj trafîkeke giran heye. Rêwî her roj bi saetan li vê derê di erebeyên xwe de dîl dimînin. Hatibû gotin ku bi çêkirina van avahiyan dê trafîka vir zêdetir giran biba. Hemû li aliyekê mirina karkeran wekî êşa ser êşan derket holê.