Diyarname

Hevserokê HDP'ê Selahattin Demirtaş îro li ser sînorê Pirsûs û Kobanî axîvî û got: "Divê aliyê rojava, rojhilat, başûr, her aliyê Tirkiyeyê piştgiriyê bide vê derê."

Demirtaş li gel mebûsên HDP'ê, Hevserokên DBP'ê û gelek kesên din îro li ser sînorê Pirsûs û Kobanî hat ba hev. Demîrtaş li vir axivî got ku ez cejna kesên ber xwe didin, bi taybetî jî cejna gelê Kobanî ku ev 20 roj in ber xwe dide pîroz dikim. Vaye ji axaftina Demîrtaş hin not:

- Ev 20 roj in Kobanî li hemberî wehşet û hoviya dijmirovî ya DAIŞ'ê ber xwe dide.
- Ger kurd û tirk li vir dest nedin hev DAIŞ îro li wir ala xwe daliqandiye, sibê dê li vir jî daliqîne. 

- Bila ev der nebe cihê ku pêvajo bi dawî bibe, bila bibe cihê ku aştiya her daîmî. 

- Bi tehdîdan, bi şantajan aştî nameşe. PKK û DAIŞ ne yek in, her kes dizanin ku tenê xaleke wan jî naxibe hev.

- Divê li hemberî DAIŞ'ê bi kordîneyî xebat bê kirin. Roj ne roja neyartî ye. Gere hikumet bi Kobanî re bikeve nav hevkariyê. Divê ne gazê bavêje gelê vê derê, piştgiriya gelê vê derê bike.

- Tu dikarî nav koalîsyona ku di nav de Amerîka heye, Îngilistan heye, tu çima nakevî nav koalîsyona ku gelê li vir çêkiriye?

- Ger peyam rast bêne fêmkirin, ji ser pirê siratê yê vê derê hatiye çêkirin emê bimeşin û bigihîjin ciheke rast. Hikumet dibêje dê kobanî nekeve, wê çaxê bila soza xwe bîne cih.

- Hêza li vir hêza îtîfakê ye, ne hêza neyar e. Bi gazê, bi copan êrîşa hêza li vir nabe. Ger tu dibêjî DAIŞ neyar e ku tu wisa dibêjî, wê çaxê divê tu wisa nêzî hêza vir nebî.

- Ji Stenbol, Îzmîr, Trabzon, Edîrne, ji bakur, başûr, rojhilat, ji her aliyê Tirkiyeyê divê piştgirî bidin vê derê.

- Ez sipasiya hevalên me yên li vê derê, sipasiya hevalên ku li hemberî copan û gazê ber xwe didin dikim. Hûn li vê derê rûmeta me diparêzin.

- Îro li vir cejna Kobanî ne, ne cejna şînê ye. Ez silavê ji bo her kesê diçe Kobanî û li wir ber xwe dide, silavê li YPG, YPJ'ê dikim. Silavê li gelê Kobanî ku ev 20 roj in ber xwe didin dikim.

Piştî Demîrtaş, Hevserokê DBP'ê Kamuran Yuksek axivî.
Niha axaftina jinên ku çûne piştgiriya Kobanî didome.