NAVENDA NÛÇEYA

Cîgirê Sekreterê Giştî yê YNK’ê yê berê Dr. Berhem Salih diyar kir ku pêwîstiya şervanên YPG'ê yên li Kobanî bi çek û alîkariya navnetewî heye. Salih da zanîn ku divê korîdorek bê vekirin da ku di wir re piştgiriya şervanên Kobanî bê kirin.

Cîgirê sekreterê giştî yê YNK’ê yê berê siyatmedarê kurd û Cîgirê Duyemîn ê Sekreterê Giştî yê YNK’ê yê berê Dr. Berhem Salih di hevpeyvîneke ligel BBC de bal kişand ser êrişên çeteyên DAIŞ’ê yên li dijî bajarê Kobanî û got: “Erka kurd, ereb, Tirkiye û civaka navneteweyî ew e ku ji bo alîkarîkirina şervanan û kesûkarên me yên li Kobanî kar bikin.”

Dr. Berhem Salih ragihand ku pêwîstiya Kobanî bi piştgiriyê heye û wiha dom kir: “Kobanî nûner û parastina pozîsyona li dijî terorê ye û pêwîstiya wê bi alîkariyê heye. Niha li Kurdistana Iraqê dilsoziyek mezin ji kesûkarên me yên li Kobanî re heye, lê pirsgirêka coxrafya heye û lewra em nikarin alîkariya çekan bigihînin wan. Pêwîstiya şervanên Kobanî bi korîdorekê heye ku çek û şervan bigihin wan.”

Cîgirê Sekreterê Giştî yê YNK’ê yê berê derbarê bombebarana balafirên hevpeymaniyê de jî wiha got: “Li Kobanî hinek caran çeteyên DAIŞ’ê tên bombebarankirin, lê ev têrê nake û pêwîstiya wan bi alîkariya çek û şervanan heye.”

Derbarê şervanên YPJ’ê de jî Berhem Salih wiha got: “Jinan li Kobanî di warê parastin û qehremantiyê de li dijî DAIŞ’ê rewşekî taybet diyarkirine. Di rastiya xwe de pêwîstiya wan bi alîkariya navneteweyî û herêmî heye, ji bo bikarin navçeya xwe biparêzin.”

Berhem Salih bal kişand ser helwesta Tirkiyeyê ya li hemberî şervanên YPG’ê û wiha got: “Di vî warî de dîtina me ya ligel Tirkiyeyê cuda ye. Cudahî di navbera şervan û parêzvanên Kobanî ligel çeteyên DAIŞ’ê yên terorîst de heye û em nikarin berhev bikin. Bêguman hestyariya siyasî ku çavkaniya rewşa kurd a li Tirkiyeyê ye, heye.”

Salih di dawiya axaftinên xwe de wiha got: “Îro li Kobanî pozîsyona li dijî terorê heye. Pêwîstiya Kobanî bi piştgiriyên pratîkî heye. Pêwîstiya wan bi çek û vekirina korîdorekê heye ku ji bo jin û mêr di wê rêyê re biçin Kobanî û jinavbirina terorîstinên ku êrîşî hemû navçeyê bikin.”