.jpg)
Ew tenê ne birakujî, xwişk-kujî ye jî û ew birakujî-xwişk-kujî, xwekujî û kurdkujî ye jî…
Xwişkno, birano! Berî hûn çekê bidin ser mil û devê wê bidin sîng û eniya hev, berî hûn tiliya xwe li têtik bişidînin divê hûn peyva em neviyên Medan e ji devê xwe derxin, û sond bixwin ku êdî pîrozkirina Newrozan li we heram e!
Berî hûn hev bikujin divê hûn Baba Tahir, Elî Herîrî, Ehmedê Xanî, Feqiyê Teyran, Hêmin, Dildar, Nalî, Hêjar, Şêrko, Mûkriyanî, Mîr Celadet, Kamûran Elî, O. Sebrî, Mestûre, Dayê Celale, Erebê Şemo, Îbrahîm Ehmed, E. Koyî, Cegerxwîn, Leyla Qasim, Eyşe Şan û Meyremxanê ji gorê derxin car din bikujin; berî hûn hev bikujin divê hûn Arjen Arî, M. Uzun, Dost Çiyayî, M. Baksî, Nûrî Dêrsimî, Apê Mûsa, Tahsîn Taha, Heciyê Cindî ji gorê rakin car din bikujin; û divê hûn evîna Derwêş û Edûlê, Mem û Zînê, Sîhemed û Xecê, Binevş û Cembêlî jî bikujin, û ferhenga kurdî jî jinav bibin…
Berî hûn hev bikujin û di nav alemê de rûyê me bidin erdê divê hûn li benda Daîşê nemînin; Laleşa Nûranî, dergehê San Sahaq û Baba Duzgin bi destên xwe birûxînin; divê hûn biçin gora Seîd Rizo, Şêx Seîdê Pîranî, Pêşewe Qazî, Barzaniyê Kal, Qasimlo, Elîşêr û Zerîfeyê hilweşînin.
Berî hûn hev bikujin divê hûn Bavê Nazê, B. Bereh, C. Celîl, E. Peşêw, E. Huseynî, Konê Reş, Tosinê Reşîd, Malmisanj, Rojan Bernas, Şivan, û romana kurdî û çîroka kurdî û helbesta kurdî û strana kurdî jî bikujin, da ku bîr nemîne, da şahid nemînin, da wate nemîne; da pirs nemîne…
Heke hûnê di wan eywanên cîhanê yên herî bi fors-di şikefteke Kurdistanê de rû bi rû rûnenin guh nedin deng û gotinên hev!?
Heke we ji bîr biribe bi sedan sal in li vî milî li wî milî bo çi çek hildaye dest, sîng daye mirinê û heke we bîr kiribe dijminê me kî ye? Nexwe, ji kerema xwe re vegerin li malên xwe rûnin; me nedivê azadiya bi xwîna xwişk û bira ya bi destê xwişk û bira tê rêtin, me nedivê Kurdistana serbixwe. Şixulê dijmin ne karê me ye! Çawa destê me kêra dijmin digire??
Di şerê birakujî-xwekujiyê de kurd im, ne alîgir, dijber im.
Eger bindestî rûreşiyek be xwekujî ducar rûreşî ye! Qe nebe bindestî bêminetî ye.
Bes e, di vê sedsalê de jî kenê dijmin bi me neynin.
Jixwe hûn çêtir dizanin, ‘li ser sofreya dijmin ku hûn yek şîv bin ê din paşîv e’.
*
Û gotinek bo yên li vê trûbînê li wê trûbînê rûniştî, ku didin halanan; ev ne maça Barselona û Real Madrîdê ye! Heke ji we tê bikin qîrîn û hawar, bêjin ne di ber me de ne ber xwe de hevûdin nekujin, heke ji we tê xwe bidin navberê rêyeke din nîşanî wan bidin, heke ji we tê jê re bêjin nekevin dafika dijmin, heke ji we tê jê re bêjin bila ji şaşiyên xwe mikur werin; û heke ji we tê bêjin di vî şerê xwekujiyê de em ne li pişt we ne! Lê heke ew ji we nayên, hiş bin, kurdan li hev sor mekin; ew ên dimirin û yên dê bimirin ne keç û lawên bavên we ne; şerm bikin şerm…
Eger siyasetên we çavê kurdbûna we ew qas kor kiribe, gelo hûn rêya mala xwe çawa ji hev derdixin?
Heke hûn ew qasî tî’yê xwîna xwişk û birayên xwe ne, ma ne di malên we de jî ew hene, de bifermin fir kin xwîna wan; noş be ji we re …
Heçî yê rabe bêje ev bi heq e ew neheq e, ew teres û fodil-qehpe, fîtne û fesad e!
Ew xwekujî ye; ti heqî û neheqî nikare wê heq û rewa nîşan bide
***
Ji bo yên bixwazin guhdarî bikin:
Ji bo yên bixwazin guhdarî bikin:
.jpg)
