Fûtbol tenî fûtbol niyo. Fûtbol parçeyke heyatê merdiman o. Fûtbol enî çî jî nîşan dano: Ti tenî xorê wazenê yan hevalê xo rê jî? Ti rêveberêke baş ê yan nê? Ti merdimêke bi aqil ê yan nê?
Ma zî tûtî bî. Ma bi goga naylonîne kay kerdêne. Ma zî bî pîlî û hendî ma jî bî wayîrê goga orjînal e. Ma zî fam kerd fûtbol çiqas muhîm o.
Erê dinya de dîktatoran bi fûtbolî şar kerd hewna. Verê yînan da goge û yê siyaset ra dûr girotî. Yê kerdî hewna. Bi seran fûtbol anekî dewam kerd. La heto bîn ro fûtbol bî nasnamey merdiman jî. Henî şaran bi fûtbolî xo bi dinya day naskerdişî. Eyro welatê Katalan bi fûtbol yeno naskerdiş. Barselona nêbayne ga Katalan endêke bêro naskerdiş? Kedey Bîlbao di naskerdişê Baskî de zehf a. Erê çawey dîktatoran fûtbol qeybî berjewendiyanê xo xebetnawo, şarî jî kenê ke fûtbolî qeybî nasnamey xo bidê xebetnayişî.
Fûtbol eno çî tenî niyo. Mesela şima şinê seha, kay kenê. Şima ewca vînenê hevalêke şima çiqas vaz dano, heta peynî qeybî nêkero vinî xover dano. Şima vînenê hebênan heval hema nîmey kaye de pes keno. Şima vînenê hebênan qe hay cê bexwedan ra çiniyo; cirê dinya ana hamiya, go ana şoro... Şima vînenê hebêna hîlekar o. Joyna "tenî vano ez"... Wexto bi enî çimî şima bawnê fûtbol ra fûtbol beno beyraykew bîn verdî şima de.
Helbet kurdan rê jî fûtbol lazim o. Qeybî ke spor ra hez bikerê fûtbol lazim o. Qeybî tenduristî lazim o. Û helbet qeybî nasname jî.
Welatê kurdan de her game serdestan dest eyşto fûtbol û ew qeybî xo xebetnawo. Bi seran tîmê kurdan qeybî na joyan hamey viraştişî, yê vetê vernî, heta lîgey joyînan jî berdê. Dimara ê lîg ra eyştê. Wexto hawnayê tîm zey yînan nêkeno, hezkerdoxê tîman zey yînan nêkenê vernî ro yînan giroto, vernî gênê. Nimûnew peyîn Amed Spor o.
Amed Spor serey 1990'yde zey Klûbey Şaredariya Bajarê Pîle ya Amedî hame viraştişî. Namey "DÎSKÎ" ro xo kerd, dimara bî "Diyarbakir Buyukşehir Belediye" û peynî de klûbe namey xo bedelna û kerd "Amed SF".
Amed Sporî bi enî namey xo serkewtinî girotî, bi taybetî di Kûpaya Tirkiya de golî eyştî tîmanê pîlan zey Bursa, Fenerbahçe, Galatasaray... Siyasetê kurdan 40 sere belkî nêşka namey Amedî bi şarê Tirikya bido naskerdişî la Amed Sporî di maçêke de seranserê Tirkiya de namey Amedî kerd vila.
Şaredariya Bajarê Pîle ya Amedî paştî dayne Amed Sporî, xora ew tîmê şaredarî bî. La dimay ke hikumetê Tirkiya bi kayyum dest da serê şaredarî rewşê Amed Sporî jî bedeliya. Kayyumî waşt Amed Sporî namey xo bibedelno, waşt yînan ra henî bikoy rêveberî Amed Sporî û vat ke yê ana nêkerê go alîkarî nêdê tîmî. Rêveberanê Amed Sporî û hezkerdoxanê Amed Sporî eno waştişê kayyumî qebûl nêkerd. La enka tîm hetê aborî ro zehmetî anceno. Qeybî ene joy klûbe kampanyaya yarmetî (alîkarî) da dest pê kerdin. Kampanya hîrê aşman dewam kena. Kam ke Amed Spor ra hez bikero eşkeno yarmetî bikero. Tay, zehf muhîm niyo, çiyo muhîm ew o ke merdim yarmetî bikero.
Se hezar tenî her jo 100 lîra pere Amed Sporî rê bişrawo, yan jî mîlyonêke merdim her jo 10 lîray bişrawo, bawnê keno çiqa pere...
Erê fûtbol tenî fûtbol niyo. Amed Spor jî tenî niyo. Ew hîvey yarmetî ma heminan o...
Yê biwazê alîkarî bidê, hesabê yînan ê banke enowo:
.jpg)
.jpg)
.jpg)
